ARROZ CON POLLO
Genoeg vir 6
Hierdie resep is die Kubaanse eweknie van paella, maar met die verskil dat dit nie seekos bevat nie. Die naam kan direk vertaal word as“rys en hoender”.
BESTANDDELE
4 hoenderdye en 4 -boudjies Sout en varsgemaalde peper na smaak
2 teelepels fyn komyn (jeera) 1 teelepel gedroogde origanum 1 teelepel knoffelvlokkies ½ teelepel cayennepeper 3 eetlepels olyfolie
1 groot ui, grofgekap
1 rooi en 1 groen soetrissie, opgesny
1 eetlepel vars knoffel
2 eetlepels tamatiepasta 1 koppie rou witrys
2 koppies hoenderaftreksel
1 x 410 g-blik tamaties, gekap 1 lourierblaar (bay leaf)
Vars pietersielie of koljander vir versiering
METODE
Geur die hoenderstukke met sout en peper. Meng die komyn, origanum, knoffel en cayennepeper in ’n bakkie. Vryf die hoender goed in met dié mengsel. Verhit die olie in ’n groot pan. Braai die hoender, ’n paar stukke op ’n slag in die olie tot bruin aan albei kante. Skep uit en hou eenkant. Voeg die ui en soetrissie in die pan en braai tot sag. Voeg die knoffel en tamatiepasta by en roer deur. Roer die rys by en roer dit goed deur en voeg die aftreksel, tamaties en lourierblaar by. Pak die hoenderstukke bo-op, bedek en prut oor lae hitte totdat die hoender gaar en rys sag is. Roer af en toe sodat dit nie brand nie. Voeg nog klein bietjies water by indien nodig. Versier met pietersielie of koljander en bedien.