MILANESA
(Gekrummelde beesvleisschnitzel met kaas en tamatiesous) Genoeg vir 6
BESTANDDELE Vleis
6 stukke schnitzel-beesvleis
2 eiers, geklits
1 knoffeltoontjie, gekap
2 eetlepels pietersielie, gekap
1 koppie koekmeel
2 koppies broodkrummels
Sout en swartpeper na smaak
Olie vir vlakbraai
1 koppie mozzarellakaas, gerasper
Tamatie-en-uiesmoor
2 eetlepels olyfolie
2 uie, grofgekap 2 ryp tamaties, grofgekap
1 knoffeltoontjie, gekap
1 teelepel sout
½ teelepel peper
1 eetlepel bruinsuiker
METODE
Vleis: Sit die vleis tussen twee lae kleefplastiek. Gebruik ’n koekroller of vleishamertjie en kap die vleis tot baie dun, maar nie stukkend nie. Meng die eiers, knoffel en pietersielie in ’n bak. Gooi die meel en krummels in twee ander plat bakke. Geur die vleis met sout en peper en doop dan om die beurt in meel, eier en laastens in broodkrummels. Pak die schnitzles op ’n bakplaat en verkoel vir 30 – 45 minute. Verhit die olie vir vlakbraai so tussen medium en baie warm in ’n pan. Braai die schnitzels vir omtrent ’n minuut aan elke kant tot gaar en goudbruin. Dreineer die vleis op kombuispapier en hou eenkant Tamatie-en-uiesmoor: Verhit die olyfolie in ’n potjie. Braai die uie tot sag en bruin. Voeg die tamaties, knoffel, sout en peper en suiker by. Bedek en prut tot die tamaties begin opbreek en die sous lekker dik is. Haal van die hitte af en hou eenkant. Samestelling: Skep ’n ruim porsie tamatie-en-uiesmoor en kaas op elke schnitzel. Rooster onder die oondelement tot die kaas net-net begin smelt. Dien dadelik op.