HOENDER MET WITWYN EN DRUIWE
Genoeg vir 6 BESTANDDELE
3 eetlepels olie
4 hoenderborsies, met vel en been
Sout en varsgemaalde swartpeper
3 middelslag rooi-uie, in wîe gesny
1 teelepel droë basiliekruid (basil) 1 teelepel hoenderspeserye (sien wenk om jou eie te maak) 1 koppie droë witwyn
1 koppie hoenderaftreksel 2 koppies pitlose wit druiwekorrels, gehalveer
’n Handvol vars basiliekruidblare (basil)
METODE
Verhit die olie in ’n kastrol en verbruin die hoenderborsies alkant. Geur met sout en peper. Skep die borsies met ’n gaatjieslepel op ’n bord en hou eenkant. Braai die uie in dieselfde olie tot sag. Geur met sout en peper en voeg die droë basiliekruid en hoenderspeserye by. Braai vir ’n minuut of twee saam. Voeg die wyn en aftreksel by en bring tot kookpunt terwyl jy dit heeltyd roer. Sit die hoenderborsies terug in die pot in die sous. Verlaag die hitte, bedek die pot en laat liggies prut vir ongeveer 20 minute of totdat die hoender deurgaar is. Roer af en toe om seker te maak die hoender brand nie vas nie. Voeg die druiwekorrels by en versnipper die basiliekruidblare in die pot. Kook vir 7 minute saam totdat die druiwe deurwarm en die pot deurtrek is met die wonderlike, aromatiese geur van die basiliekruid. Skep die borsies uit op ’n opdienbord en versier met vars basiliekruidblare. Bedien met wit rys en groente.
WENK:
Hoenderspeserye (ongeveer 100 ml): Meng 3 eetlepels soutvlokkies, 1 eetlepel varsgemaalde swartpeper, ½ teelepel droë pietersielie, ½ teelepel uiepoeier, ¼ teelepel droë tiemie, ½ teelepel droë origanum, 1 teelepel knoffelvlokkies, ¼ teelepel gerookte paprika, ¼ teelepel rooipeper, ¼ teelepel rissievlokkies en 1 eetlepel hoenderaftrekselpoeier. As jy ’n effe matiger geursel wil hê, kan jy die rooipeper en rissievlokkies weglaat.