Waterblommetjiebredie
2,5 kg waterblommetjies, skoongemaak 1 kg skaapvleis (’n kombinasie van dikrib, platrib en skaapstertjies) 15 ml bruinasyn Sout en vars gemaalde swartpeper na smaak Knippie gerasperde neutmuskaat 1 ui, grof gekap 1 knoffelhuisie, fyn gekap 1 bossie wilde suring, fyn gekap 500 g aartappels, geskil en in wiggies gesny 250 ml warm water Suurlemoen, om voor te sit
Voor jy begin: Week die waterblommetjies oornag in soutwater en spoel goed af. Verwyder ál die sand en vuiligheid, asook die harde dele van die blomme en blare.
Gebruik ’n swaarboom-gietysterpot met ’n deksel. Geur die vleis met asyn, sout, peper en neutmuskaat. Stowe die vleis, ui en knoffel in ’n bietjie water tot sag. Voeg die waterblommetjies en suring by en sit die aartappels bo- op. Geur goed met sout, peper en neutmuskaat en voeg die 250 ml warm water by. Verhit tot kookpunt, bedek en laat prut tot sag. (Hou ekstra warm water byderhand as dit lyk of die bredie te droog kook, maar wees versigtig om dit nie tot ’n sop te kook nie.) Moenie die inhoud van die pot roer terwyl dit kook nie. Roer dit eers net voor die bredie opgeskep word om die vleis, aartappels en waterblommetjies te meng. Sit voor op rys met ’n suurlemoenwiggie aan die kant. Lewer 6 porsies.