Lamsribpasteie
Lamsrib is ’n uiters geurige snit danksy die vet en bene. Dit sorg dus vir ’n smaaklike, ryk pasteivulsel, sonder dat jy nodig het om veel daarby te sit. Ek hou van lamsrib eenvoudig gaargemaak – net sout, peper en ’n bietjie gemaalde koljander. Aan die einde van die gaarmaaktyd en nadat die bene verwyder is, voeg ek ’n lepel sjerrie-asyn of ’n skeut suurlemoensap by.
Broskorsdeeg 750 ml koekmeel 7 ml sout 250 g koue botter, gerasper of in klein blokkies gesny 1 groot eiergeel Yswater
Vulsel 2 lamsribbetjies, in ribstukkies gesny Sout en vars gemaalde swartpeper na smaak 15 ml fyn koljander Sjerrie-asyn of vars suurlemoensap
1 eier, geklits
Deeg: Pols die meel, sout en botter in ’n voedselverwerker saam tot krummelrig (of vryf die botter met jou vingerpunte by die meel en sout in). Voeg die eiergeel en ’n paar druppels yswater by tot klam frummels vorm wat aan mekaar begin vassit. Keer die mengsel op ’n werksoppervlak uit en druk bymekaar in ’n plat skyf deeg. Draai in kleefplastiek toe en verkoel vir minstens ’n uur. Vulsel: Geur die ribstukkies met sout, peper en koljander. Plaas dit saam met ’n bietjie water in ’n drukkoker en kook of stoom dit tot die vleis van die bene val. Verwyder die bene en sny die vleis fyner. Geur dit met sjerrie-asyn of suurlemoensap en laat die vulsel afkoel.
Voorverhit die oond tot 190 °C en smeer ’n muffinpan met olie of bespuit die pan met kleefwerende kossproei. Rol die deeg op ’n meelbestrooide oppervlak uit en sny 8-10 groot sirkels uit (waarmee jy die boom en kante van die muffinholtes kan uitvoer). Voer die pan se holtes met die deeg uit en skep die vleisvulsel in. Druk die orige deeg liggies bymekaar en rol dit weer uit. Druk kleiner sirkels uit en bedek die vleisvulsel daarmee. Verseël die kante en verf die deeg met eier. Bak vir sowat 30 minute tot gaar en goudbruin. Sit die pasteie (warm of teen ka- mertemperatuur) voor met slaai van jou keuse. Lewer 8-10 pasteie.
Ek het hierdie kasserol oorspronklik met heerenbone (’n skaars boon uit die Sandveld) gemaak vir ’n artikel in Landbouweekblad, maar jy kan enige ander droëbone hiervoor gebruik. Saam met rib bly skaapnek my eerste keuse vir ’n stowegereg. Onthou net om met ’n skêr of mes ’n paar kepe in die buitekant van die nek te sny om te keer dat dit opkrul wanneer dit met hitte in aanraking kom.
1 kg skaapnek, in skywe gesaag 5 ml gemaalde koljander Sout en vars gemaalde swartpeper Olie, vir braai 3 middelslag-uie, gekap 4 stele seldery, gekap 4 knoffelhuisies, fyn gekap 12 ml masala 5 ml borrie 5 ml mosterdpoeier 30 ml appelkooskonfyt 3 ml elk sout en vars gemaalde swartpeper 2 stukke kassia 60 ml asyn 500 ml vleisaftreksel 400 g droëbone, vir ongeveer 2 uur in louwarm water geweek Water Vars pietersielie en fyngerasperde
Voorverhit die oond tot 170 °C. Gebruik ’n skerp kombuisskêr en knip ’n paar kepe in die kant van elke stuk nek. Geur die vleis met koljander, sout en peper. Verhit ’n bietjie olie in ’n groot, oondvaste swaarboomkastrol en braai die nek in lotte daarin bruin. Skep die vleis uit en hou eenkant. Braai die uie en seldery in dieselfde kastrol tot die uie taamlik sag is. Voeg die knoffel, masala, borrie en mosterdpoeier by en braai vir ’n paar sekondes. Voeg die appelkooskonfyt, sout, peper, kassia, asyn en vleisaftreksel by en verhit tot kookpunt. Laat prut vir sowat 5 minute en skep dan die bruingebraaide skaapnek (en alle pansouse wat in die bord afgedrup het) in die kastrol. Maak seker die vleis is met die sous bedek. Bedek die kastrol met ’n digpassende deksel en sit dit in die oond. Bak vir 1½ uur tot 2 uur of tot die skaapnek sag is.
Terwyl die kasserol bak, dreineer die bone en gooi enige verfrommelde of gevlekte bone weg. Sit die bone in ’n kastrol met skoon water (sonder sout). (Gebruik dubbeld soveel water as bone.) Kook die bone tot dit sag is, dreineer en hou eenkant.
Haal die kasserolgereg uit die oond, voeg die bone by en roer. Bedek weer die kastrol en bak vir ’n verdere 30-40 minute tot die vleis baie sag is en die bone van die lekker sous geabsorbeer het. Sprinkel gekapte pietersielie en fyngerasperde suurlemoenskil oor.
Sit die kasserol voor met ’n styselgereg en groente of slaai van jou keuse. Lewer 6-8 porsies.