Pitas gevul met koolslaai, varkvleisfrikkadelle en bloukaas

Hierdie kortpad-middagete skiet beslis nie tekort aan geur nie. Jy kan nog tyd en moeite bespaar deur sommer die varkworsies heel gaar te maak en die pitas met stukkies daarvan te vul.

500 g varkworsies Olie, vir braai 8 pitabrode 500 ml gesnipperde blaarslaai 500 ml klaarbereide koolslaai 100 g bloukaas, dun gesny of gekrummel

Druk die worsvleis uit die derms en rol dit in ewe groot balletjies. Verhit ’n klein bietjie olie in ’n swaarboompan en braai die varkworsiefrikkadelle daarin tot gaar. Verhit die pitas tot opgepof en sny versigtig oop. Stop ’n paar lepels gesnipperde blaarslaai in die pitabrode. Skep koolslaai, bloukaas en ’n paar varkvleisfrikkadelle op die blaarslaai in elke pita en bedien dit dadelik saam met ’n koue bier. Lewer 8 porsies.