Soetsuur vark met pynappel en gemmer
Die eier-en-mielieblomlagie sorg vir ’n bros kors om elke blokkie varkvleis, wat die soetsuur sous opslurp. As jy wil, kan jy groente van jou keuse roerbraai en by hierdie gereg voeg om dit ekstra kleur te gee en dit te rek. Broccoli en soetrissie pas goed hierby.
500 g varknek of -filet Sout en vars gemaalde swartpeper 2 eiers 180 ml mielieblom Olie, vir braai Halwe, vars pynappel, skoongemaak en in stukkies gesny 4 grasuie, gesnipper 5 cm-stuk vars gemmer, geskil en in dun skyfies gesny 2 groot knoffelhuisies, geskil en in dun skyfies gesny 2 groen jalapeñorissies, in fyn skyfies gesny
Soetsuur sous 30 ml tamatiesous 15 ml heuning 30 ml sojasous 30 ml water 30 ml sjerrie 5 ml mielieblom
Sny die varkvleis in hapgrootte blokkies. Geur goed met sout en peper. Verhit 1 cm olie in ’n groot pan. Doop elke blokkie varkvleis in eier en rol dan in mielieblom. Braai die blokkies varkvleis in lotte in die warm olie tot goudbruin, bros en deurgaar. Skep uit en hou eenkant.
Sodra al die varkvleis gebraai is, vee die pan met kombuispapier uit en verhit weer ’n klein bietjie olie daarin. Braai die grasuie, gemmer, knoffel en rissies tot geurig. Voeg die pynappel by en braai vir ongeveer ’n minuut. Meng al die bestanddele vir die soetsuur sous saam. Skep die bros varkvleisblokkies terug in die pan saam met die pynappel en ander bestanddele en skep die soetsuursous oor. Roerbraai totdat elke happie vleis met die sous bedek is en die sous borrel en verdik. Geur na smaak met sout en peper en sit voor op rys of noedels. Rond af met ekstra brandrissie of skyfies gemmer, of met vars koljanderblare. Lewer 4 porsies.