Só sê ’n DROËVRUGTEBOER
HANDRI CONRADIE PRINCE ALFRED HAMLET, WES-KAAP
Die Conradie-familie boer al sewe geslagte lank op Koelfontein, ’n vrugteen-wynplaas in die Warm-Bokkeveld. Frans Conradie was alombekend as droëvrugte-koning en nou neem sy seun, Handri, die produksie van droëvrugte tot nuwe hoogtes met At Source, wat puik droëvrugteprodukte maak en versprei.
JULLE BOER TRADISIONEEL MET DROËVRUGTE, MAAR JY HET ’N GAPING GESIEN OM IETS MEER DAARVAN TE MAAK. WAT WAS DIE INSPIRASIE? Droëvrugte was een van die aspekte in ons boerdery waarop my pa altyd gekonsentreer het. Hy het ’n reputasie gehad dat hy vrugte van uitsonderlike gehalte lewer. Ek het op skool al gevoel dis iets wat ons laat uitstaan bo die res en wat ons verder behoort te ontgin, hoewel dit nog in die tyd van eenkanaalbemarking was. In die laat 1990’s is landboubemarking gedereguleer. Toe ek in 2002 plaas toe gekom het, het ek besluit om die supermarkte regstreeks te nader en aan hulle te verskaf. Dit het nie net aan ons die voordeel gegee om groter beheer oor die waardeketting te verkry nie, maar dit het ons ook nader aan ons klante gebring en gehelp om hul behoeftes beter te verstaan.
HOEVEEL VERSKILLENDE PRODUKTE HET JY NOU? Ons het seker sowat 250 produklyne wat ons aan kleinhandelaars, soos Woolworths, asook Waitrose, David Jones en Marks & Spencer in die buiteland, verskaf.
WAAR KOM AL JUL VRUGTE VANDAAN? Koelfontein is steeds ons ankerverskaffer, maar ons koop ook sagtevrugte uit die res van die Wes-Kaap aan. Mango’s kom uit die Laeveld, pynappels uit die Oos-Kaap en rosyntjies uit die Noord-Kaap. Ons voer ook produkte in — appelkose en vye uit Turkye, pruimedante uit SuidAmerika en dadels uit Iran. Ons kyk altyd na nuwe neigings en verbruikersbehoeftes en gaan soek dan die vrugte en ontwikkel die produkte wat hulle graag wil hê.
HOE MAAK JULLE SEKER DIE VRUGTE WAT JULLE AANKOOP, VOLDOEN AAN JUL STRENG GEHALTEVEREISTES? Ons soek tot ons ’n verskaffer opspoor met wie ons ’n langtermynverbintenis kan aanknoop. Dit moet iemand wees wat ons maatskappy se behoeftes verstaan.
HOEKOM IS DIE WARM-BOKKEVELD SO BEKEND VIR DIE LEKKER VRUGTE WAT DAAR VERBOU WORD? Onsklimaat iseffenswarmerasin die Koue-Bokkeveld, wat beteken ons vrugte se suikervlak is hoër en smaakontwikkeling beter. Dis egter koeler as in ander dele, soos die Breëriviervallei en die Klein-Karoo. Daarom kan ons gewasse hier verbou wat ander gebiede met minder winterkoue nie kan nie. Ons kan die hele spektrum — van appelkose tot perskes, nektariens en pere — verbou.
JULLE GEBRUIK ’N KOMBINASIE VAN TRADISIONELE METODES EN MODERNE KENNIS OM HEERLIKE, SAGTE DROËVRUGTE TE MAAK. HOE WERK DIE PROSES? Ons koop die gedroogde produkte aan en rehidreer dit dan tot op ’n sekere punt. Ons maak ook staat op verpakkings- en pakmateriaaltegnologie en ’n gesofistikeerde logistieke kettingom dieproduk te verspreiomdat die raklewe korter is. Dis ’n produk wat ’n hoër risiko inhou, maar met die regte tegnologie kan dit gedoen word.
IS JOU HELE GESIN LIEF VIR DROËVRUGTE? O ja, ons pak dit graag in as padkos, soos wat ’n mens met biltong sou maak. My vrou, Noelani, is baie lief vir droëmango’s, maar ek verkies weer gedroogde appelkose.