Brandewynpoeding met geposjeerde rooibospere
Brandewynpoeding kan koud of warm vir teetyd of nagereg voorgesit word. Jy kan dit selfs in ’n swartpot op die vuur maak as jy wil. Die sagte pere word in ’n sous van speserye en rooibostee geprut en komplementeer die ryk poeding perfek.
Beslag 250 g dadels, ontpit en fyn gekap 5 ml koeksoda 250 ml kookwater 125 g botter 250 ml ligbruinsuiker 2 eiers, geklits 500 ml koekmeel 5 ml bakpoeier 2 ml sout 250 ml pekanneute, gekap
Sous 15 ml botter 310 ml ligbruinsuiker 180 ml water 125 ml brandewyn 5 ml vanieljegeursel
Voorverhit die oond tot 180 °C en smeer ’n groot tertbak met botter. Sit die dadels in ’n bak en sprinkel die koeksoda oor. Giet die kookwater oor, roer deur en hou eenkant. Verroom die botter en suiker goed en klits die eiers by. Voeg die dadels by en klits deur. Sif die meel, bakpoeier en sout oor en voeg die neute by. Roer tot goed gemeng en skep in die voorbereide tertbak. Bak sowat 40 minute tot gaar. Terwyl die poeding bak, maak die sous. Verhit die botter, suiker, water en die helfte van die brandewyn saam tot kookpunt. Laat vinnig kook vir 5 minute, verwyder van die hitte en voeg die res van die brandewyn en die vanieljegeursel by. Giet die sous oor die poeding sodra dit uit die oond kom. Sit voor met die geposjeerde pere en saggeklopte room waarby fyngerasperde nartjieskil ingevou is. Lewer 10-12 porsies.
Geposjeerde rooibospere 6 ferm pere, geskil en gehalveer Suurlemoensap 500 ml witsuiker 1,5 liter water 4 rooibosteesakkies 3 kaneelstokke 8 kardemompeule, gekneus 5 elk peperkorrels en steranyssade Dik reep suurlemoenskil Skeut suurlemoensap 45 ml heuning
Sit die pere in ’n bak water met suurlemoensap om te keer dat dit verbruin. Verhit die suiker, water, teesakkies, speserye, suurlemoenskil en -sap en heuning in ’n diep kastrol tot kookpunt. Kook vinnig vir 5 minute. Sit die pere versigtig in die vloeistof (maak seker die pere is heeltemal bedek) en prut vir sowat 20 minute tot die pere sag is. Skep die pere uit en laat die vloeistof vinnig afkook tot ’n ligte stroop vorm. Skep die pere terug in die stroop en laat staan tot die stroop kamertemperatuur bereik. Lewer 10-12 porsies.