Tradisionele Hertzoggies

Kors 450 ml koekmeel 37 ml strooisuiker 10 ml bakpoeier 1 ml sout 125 g botter 3 ekstragroot eiergele 15 ml koue water

Vulsel 60-75 ml fyn appelkooskonfyt

Bolaag 3 ekstragroot eierwitte 300 ml witsuiker 400 ml klapper

Smeer die holtes van kolwyntjiepanne met botter of spuit met kleefwerende kossproei. Pols die droë bestanddele vinnig in ’n voedselverwerker en voeg die botter by. Pols tot krummelrig. (Jy kan ook die botter met jou vingerpunte by die droë bestanddele invryf tot dit soos fyn broodkrummels lyk.) Klits die eiergele en water saam en voeg by. Pols tot klam krummels vorm wat begin bind. (Voeg ’n paar druppels yswater by as dit te droog lyk.) Druk die deeg bymekaar, bedek met kleefplastiek en laat vir minstens ’n uur in die yskas rus. Voorverhit die oond tot 180 °C. Rol die deeg dun uit op ’n meelbestrooide oppervlak en druk groot genoeg sirkels uit om die holtes van die pannetjies vol te maak. Voer die holtes met die deegsirkels uit. Skep ’n klein lepeltjie konfyt in die deegdoppies en sit die pan in die yskas terwyl jy die bolaag maak. Klits die eierwitte tot stywe punte vorm en voeg die suiker lepel vir lepel by, terwyl geklits word. Vou die klapper in en skep lepels vol van die mengsel op die konfyt. Maak seker die bolaag bedek die konfyt goed, anders sal dit uitkook. Bak vir ongeveer 15 minute tot die bolaag goudbruin is. Laat op ’n draadrak afkoel en bêre in ’n lugdigte houer. Lewer 12 Hertzoggies.