Skaap-en-groentepot
Die vleis in hierdie potjieresep is ekstra geurig omdat dit vooraf gemarineer word.
Marinade 80 ml worcestersous 7 ml sojasous 60 ml rooiwynasyn 30 ml olyfolie 5 ml vars gemaalde swartpeper 10 ml vars tiemie, fyn gekap 5 ml vars roosmaryn, fyn gekap
Potjie 1,2 kg stoweskaapvleis, in stukkies gesaag
Olie, vir braai 2 groot uie, grof gekap 4 knoffelhuisies, grof gekap 5 cm vars gemmer, fyn gerasper 5 ml gemaalde koljander 5 ml fyn komyn 5 ml paprika 625 ml vleisaftreksel 30 ml appelkooskonfyt 3 aartappels, geskil en in stukke gesny 3 groot wortels, in stukkies gesny 250 g knopiesampioene 350 g broccoli, in stukke gesny Sout en vars gemaalde swartpeper
Meng ál die bestanddele vir die marinade saam en giet oor die vleis (in ’n nie-metaalbak). Bedek en verkoel vir 1-2 dae.
Skep die vleis uit die marinade, maar hou die marinade eenkant. Verhit ’n bietjie olie in ’n groot swartpot oor warm kole. Braai die vleis in lotte daarin bruin. Skep uit en hou eenkant. Braai die uie in dieselfde pot tot sag. Voeg die knoffel, gemmer, koljander, komyn en paprika by. Skep die vleis (en enige pansouse wat gevorm het) terug in die swartpot. Meng die aftreksel en appelkooskonfyt met die vleismarinade en voeg dit ook by die vleis in die swartpot. Verhit tot kookpunt, bedek en laat prut die pot stadig oor matige kole vir ongeveer 2 uur of tot die vleis sag is. Voeg die aartappels en wortels by, maar moenie roer nie. Bedek en laat prut vir 30 minute. Voeg nou die sampioene en broccoli by, bedek weer en laat prut vir nog 20-30 minute tot die groente sag, die vleis murgsag en die sous dik en geurig is. Geur na smaak met sout en peper en sit voor op rys. Lewer 8 porsies.