Afval

Volgens vroeë resepteboeke is hoofkaas (sult) al in die 17de eeu deur die Hollanders gemaak. Maar ons manier om die dier se kop, pens en pootjies vir vaalafval te gebruik, is saam met die Franse Hugenote na die Kaap gebring. So ook die gebruik om die harsings in die ruitjiespens toe te bind en saam met die afval te kook. Daar het ongelukkig min van die eens tradisionele afvalgeregte behoue gebly. Vaal- en kerrieafval, gebakte skaapkop, beestong, sult, bees- en varkwange, skaap- en beesstert, lewer en niertjies in suursous is nog algemeen en word gereeld gemaak, maar geregte soos haksel, andoelie (rolpens), peertjies en pannas wat eens geliefde geregte aan die Kaap was, word nie meer aangetref nie. Kyk in die Vleisafdeling op bl. 59 vir tradisionele afvalresepte.