NAGEREG EN TEETYD
Duitse kaaskoek
Duitse kaaskoek is ligter en nie so soet soos Amerikaanse gebakte kaaskoek nie. Die ligte tekstuur is te danke aan geklopte eierwit wat aan die einde deur die kaasmengsel gevou word en die afwesigheid van roomkaas. Tradisioneel word Duitse kaaskoek met quark gemaak – ’n vars kaas soortgelyk aan maaskaas, maar met ’n sagter tekstuur, soos dié van volroomjogurt. Vir die weergawe wat ek gebak het, het ek ’n mengsel van maaskaas en jogurt pleks van quark gebruik, en die eindresultaat was perfek.
Kors 375 ml koekmeel 5 ml bakpoeier Knippie sout 10 ml vanieljegeursel Fyngerasperde skil van 1 suurlemoen 80 ml strooisuiker 1 ekstragroot eier 120 g sagte botter
Vulsel 1 houer (250 g) gladde maaskaas 250 ml dik volroomjogurt 250 ml suurroom 200 ml strooisuiker 30 ml mielieblom 10 ml vanieljegeursel 3 ekstragroot eiers Knippie sout
Kersiebolaag 500 ml ontpitte, vars kersies of geblikte kersies (goed gedreineer) 250 ml suiker 250 ml water 10 ml vlapoeier Koue water 3 ml vanieljegeursel 30 ml kersielikeur (opsioneel)
Deeg: Sit ál die bestanddele vir die deeg saam in ’n voedselverwerker en pols tot ’n sagte deeg vorm. Draai die deeg in kleefplastiek toe en verkoel vir minstens 1 uur. Spuit ’n losboomkoekpan van 25 cm met kleefwerende kossproei. Haal die deeg uit die yskas en breek stukkies daarvan af. Gebruik jou vingers om die deeg egalig op die boom en teen die kante van die voorbereide pan vas te druk. Verkoel die uitgevoerde pan tot benodig. Voorverhit die oond tot 150 °C. Vulsel: Klits die maaskaas, jogurt, suurroom, strooisuiker, mielieblom en vanieljegeursel saam. Skei die eiers en voeg die eiergele by die maaskaasmengsel. Meng goed. Klits die eierwitte met die sout tot stywe punte vorm en vou dit by die maaskaasmengsel in. Skep die vulsel in die kors en bak die kaaskoek vir 50 minute tot net-net ferm. Skakel die oond af, maak
die oonddeur op ’n skrefie oop en laat die kaaskoek in die oond afkoel. Kersiebolaag: Verhit die kersies, suiker en water stadig saam tot kookpunt. Prut vir ongeveer 10 minute (korter vir geblikte kersies – moenie die kersies té lank kook sodat dit pap word nie). Maak die vlapoeier met ’n bietjie koue water tot ’n gladde pasta aan en roer dit by die kersiemengsel. Prut, terwyl geroer word, tot die sous verdik is en gaar proe. Verwyder van die hitte en roer die vanieljegeursel en kersielikeur by. Laat afkoel tot louwarm en smeer oor die kaaskoek.
Verkoel die kaaskoek tot sowat 1 uur voor jy dit wil voorsit. Haal uit die yskas en laat dit buite staan sodat dit nie koud is wanneer dit bedien word nie. Lewer 12-14 porsies.
Maklike appelstrudel met fillodeeg
Om egte strudeldeeg te maak, is ’n tydsame proses. Jy moet die deeg só dun uitrol dat jy koerant daardeur kan lees . . . Gelukkig is daar ’n kortpadmanier waar die meeste van die werk klaar vir ons gedoen is. Papierdun filodeeg maak dit maklik om dié hemelse appellekkerny te maak. Sit appelstrudel louwarm voor met geklopte room of roomys.
Vulsel 4 appels, geskil, ontkern en in wiggies gesny óf 1 blik (440 g) tertappelstukke, gedreineer en fyner gekap 180 ml pitlose rosyne of goue sultanas 60 ml kaneelsuiker 1 ml elk fyn gemmer en gemaalde kardemom Knippie neutmuskaat 100 ml geroosterde pekanneute, fyn gekap (opsioneel)
7 velle fillodeeg 125 ml gesmelte botter
Versiersuiker, om oor te sif
As jy vars appels gebruik, kook dit in ’n klein bietjie water met ’n skeut suurlemoensap daarin tot sag. Dreineer goed en kap effens fyner. Meng die appelstukkies met die rosyne of sultanas, kaneelsuiker, speserye en neute (indien gebruik). Hou eenkant.
Voorverhit die oond tot 190 °C en voer ’n groot bakplaat met bakpapier uit. Spuit liggies met kleefwerende kossproei. Verf elke vel fillodeeg goed met gesmelte botter en stapel die sewe velle op mekaar. Skep die appelvulsel in die lengte van die deeg af op die een helfte van die deeg en versprei egalig. Verf die ander helfte van die deeg, waarop daar nie vulsel geskep is nie, met gesmelte botter. Begin die deeg oprol, van die kant af waarop die vulsel geskep is, soos ’n rolkoek. Sit die rol (met die naat na onder) op die bakplaat neer en verf die bokant ook goed met gesmelte botter. Bak vir ongeveer 30 minute tot die strudel goudbruin en vlokkig is. Haal uit die oond, sif versiersuiker oor terwyl die strudel nog warm is en laat afkoel tot louwarm. Sit voor met geklopte room. Lewer 8 porsies.
Gugelhupf
Hierdie koek met sy kenmerkende Bundtvorm, ’n gunsteling in Oostenryk, Duitsland en Switserland, is tradisioneel met gis gebak en met kerslikeur, amandels en rosyne gegeur. Deur die jare het daar egter ’n legio variasies op die tradisionele resep ontstaan. Hierdie kortpad-weergawe kry sy fyn tekstuur van versiersuiker. Dit word boonop met bruismeel gemaak, wat dit natuurlik baie vinniger maak om te bak as die oorspronklike giskoek.
Botter, om pan te smeer 430 ml versiersuiker 160 ml gesmelte botter 10 ml vanieljegeursel 3 ekstragroot eiers, geskei 500 ml bruismeel 5 ml bakpoeier 125 ml louwarm melk 45 ml kakao, gesif Bietjie water
Versiersel 200 g donker sjokolade, gekap 180 ml room Druppel amandelgeursel
Voorverhit die oond tot 180 °C en smeer ’n Bundt-pan baie goed met gesmelte botter. Klits die versiersuiker, botter, vanieljegeursel en eiergele goed saam. Voeg die meel, bakpoeier en melk by en meng tot ’n gladde, dik beslag vorm.
Maak die kakao met ’n bietjie water tot ’n pasta aan. Verdeel die deeg in twee gelyke dele. Voeg die kakaomengsel by die een helfte van die deeg en roer deur tot goed gemeng. Klits die eierwitte in ’n skoon bak tot stywe punte vorm. Voeg die helfte van die geklopte eierwit by die vanieljebeslag en die ander helfte by die sjokoladebeslag en vou in.
Skep ’n paar lepels van die vanieljebeslag in die pan, gevolg deur ’n laag sjokoladebeslag, dan nog ’n laag vanieljebeslag, gevolg deur ’n laag sjokoladebeslag. Bak die koek vir 50-60 minute tot deurgaar of tot ’n toetspen skoon uit die hoogste deel van die koek kom. Keer die koek op ’n draadrak uit en laat afkoel tot kamertemperatuur.
Smelt die sjokolade en room saam tot glad oor lae hitte. Roer die druppel amandelgeursel by en skep die versiersel oor die koek sodat dit teen die kante afloop. Laat staan tot ferm en sit voor. Lewer 12-14 porsies.