DUITSE GEURE UIT TRUDIE SE KOMBUIS

Piekels, mosterd, suurkool en kappertjiesaad gee ’n Duitse geur aan Namibiese vleiskos.

MMM . . . MOSTERD

As jy vinnig iets soek om vleisdisse of toebroodjies woema te gee, is dít die geurgewer om nader te trek. Mosterd is onlosmaaklik deel van die Duitse kookkuns en word saam met alles van gerookte wors, vis, vleis, kaas en brood tot bier of eiers geniet. Duitse mosterd in bierbeker, R44,99 vir 250 ml by Pick n Pay.

PROE AAN PEPERWORTEL

Peperwortel ( horseradish) is dalk nie aan almal bekend nie, maar tot jy nie ’n mespunt peperwortelsous of -room deur ’n bietjie suurroom of mayonnaise geroer en dit oor aartappel geëet het, weet jy nie wat lekker is nie. Peperwortelsous, R44,95 vir 130 g by uitgesoekte supermarkte.

GEURIGE GROEN BESSIES EN SADE

Al ooit gewonder wat is die verskil tussen kappertjiesaad ( capers of caper seeds) en kappertjiebessies ( caper berries)? Dié twee produkte is eintlik dieselfdeding, maarnetinverskillende stadiums van ontwikkeling. Kappertjiesaad is die groen botsels van die kapperbos, wat vroeg gepluk en gepekel word. As die botsels gelos word om verder uit te loop, kry jy die groter kappertjiebessies. Kappertjiesaad het ’n sterker, intense geur, terwyl kappertjiebessies ’n matiger smaak het.

SO BY MY KOOL

Suurkool (sauerkraut) is fyngesnyde, gefermenteerde blaarkool en baie gewild in die OosEuropese kookkuns. Eet dit as bykos by ’n vleisgereg (dis veral lekker by gerookte vleis), skep dit op ’n worsrolletjie of geniet as slaai. Gundelsheim Sauerkraut, R49,99 vir 810 g by Woolworths.

GERIEFLIK EN GEURIG

So gepraat van mosterd . . . Kies ’n kortpad en laai Creative Cuisine Pantry se smullekker slaphakskeentjies en korrelmosterd-en-heuningslaaisous in jou inkopiemandjie. Dit smaak nes tuisgemaak. Creative Cuisine se Slaphakskeentjies, vanaf R44,99 vir 540 g, en Wholegrain Mustard & Honey Dressing, vanaf R58,99 vir 375 ml by uitgesoekte winkels.

SLAAN SCHNITZELS VIR ’N SES

Maak min werk van tradisionele schnitzels met ’n nuttige vleishamer, R99,99 van Checkers.

TRANETREKKERS

’n Kombuis sonder uie is soos ’n vleisbraai sonder ’n braaibroodjie – ’n hartseersaak. Wees op die uitkyk vir verskillende soorte uie en eksperimenteer ’n bietjie. Rooi-uie maak fantastiese piekels en is heerlik in slaai. Salotte is ideaal vir souse. En piekeluitjies, net so heel in die pot gegooi, is lekker in stowegeregte, soos in Trudie se springbokskenkelresep.