BAK SOOS HANS-OTTO
Hier is ’n paar hulpmiddels, raad en wenke om bobaas-brood en Duitse appelgebak te maak.
BEGIN MET GOEIE MEEL
Ja, jy sal regtig die verskil in jou brood en gebak proe as jy met gesonde meel bak. Gideon Milling se klipgemaalde meel word van uitgesoekte koring gemaak wat nie aan oormatige hitte blootgestel word in die maalproses nie, en daarom gaan die voedingswaarde van die meel nie verlore nie. Al die noodsaaklike vetsure, vitamiene, vesel en voedsaamheid bly behoue. Gideon Milling se produkte is beskikbaar by uitgesoekte Checkersen Spar-takke, asook sommige spesialiteitswinkels. Besoek www.gideonmilling.co.za vir nog inligting.
DIE BESTE BROS KORSIE
Dit gebeur dikwels dat brood wat in panne gebak word, nie ’n bros kors aan die onderkant of teen die kante vorm nie. As dit ’n probleem is waarmee jy sukkel, is hierdie broodpan die antwoord vir jou. Die gaatjies in die metaal laat stoom toe om te ontsnap, wat verseker dat die onderkant en kante van die brood bros bak. Onthou net dat die pan nie geskik is vir ’n slap beslag nie, maar net sal werk vir brooddeeg. Eetrite Crispy Baking Loaf-pan, R229, Yuppiechef.com
BAK MET DIÉ APPELS
Die vrug wat seker die meeste in Duitse gebak en nagereg gebruik word, is appels. Die beste appels om mee te bak, is die groen en geel kultivars. Die bekendste soort groen en geel appels, Granny Smith en Golden Delicious, is ideaal vir ál die resepte vir appelgebak in hierdie uitgawe. Stoom appels in ’n klein bietjie water waarin jy ’n halwe suurlemoen uitgedruk het as jy wil hê die vrugte in jou gebak moet ’n suurder smaak hê, of stowe dit in water met ’n lepel suiker en heel speserye vir ’n meer tradisionele karamelappel-en-speserygeur.
BLAARDEEG VIR LATER
As jy die moeite doen om self blaardeeg te maak, maak sommer genoeg om te vries vir volgende keer se gebruik. Blaar- en skilferkorsdeeg vries uitstekend. As jy blaardeeg (soos nodig vir die Schweineohren op bl. 32) wil vries, rol dit eers dunner uit op ’n oppervlak wat liggies met meel besprinkel is. Rol dan die uitgerolde deeg in ’n rolletjie op. Draai dit goed toe met kleefplastiek en vries vir tot 3 maande.
HOU DIÉ RAKKE DOP VIR ROGMEEL
Rogmeel is nie altyd geredelik beskikbaar nie. As jy dit nie tussen die ander soorte meel in jou supermark kan opspoor nie, soek daarvoor in die gesondheidsafdeling of by gesondheidskoswinkels. Rogmeel, R29,95 vir 500 g, Woolworths.