Dubbelkaasburger met brandewyn-sampioensous
Burgerkoekies
500 g beesmaalvleis 1 ui, gerasper 3 knoffelhuisies, fyngekap Hand vol vars kruie, fyngekap 1 eier Sout en vars gemaalde swartpeper na smaak Olie, vir braai
4 skywe beleë cheddarkaas 4 hamburgerrolletjies en botter, vir smeer Groot hand vol kropslaai, fyngesnipper
Brandewyn-sampioensous
45 ml botter 250 g bruinsampioene, fyngesnipper Sout en varsgemaalde swartpeper 45 ml brandewyn 180 ml room
Burgerkoekies: Meng die maalvleis, ui, knoffel, kruie, eier, sout en peper goed deur met jou hande. Verkoel die mengsel vir 15 minute. Vorm 8 ewe groot balle en druk dit plat. Braai dit in ’n pan met ’n bietjie olie tot goudbruin aan albei kante en deurgaar. Verwyder van die hitte. Sit ’n skyf cheddarkaas op 4 van die burgerkoekies en sit ’n deksel op die pan. (Die hitte van die pan sal die kaas laat smelt.)
Terwyl die burgerkoekies rus, maak die sous. Verhit die botter in ’n pan en braai die sampioene vinnig oor hoë hitte tot gaar. Geur met sout en peper en voeg die brandewyn by. Braai en laat die brandewyn opvlam. Voeg die room by en prut verder tot die sous geurig en afgekook is.
Smeer die hamburgerrolletjies met botter en sit ’n porsie gesnipperde kropslaai op die onderste deel van die rolletjie. Sit die burgerkoekie met die gesmelte kaas op die kropslaai en die ander burgerkoekie bo-op. Skep ’n groot lepel van die warm, romerige sampioensous oor en sit die bokant van die rolletjie op. Steek ’n sosatiestokkie deur die hele burger en sit dadelik voor met bros uieringe en skyfies. Lewer 4 groot porsies.