SKAAP- & LAMSVLEIS
Lamskerrie met droëperskes
1,5 kg lamskouer, in blokkies gesny 30 ml olie 4 uie, in wiggies gesny 15 ml elk kerriepoeier en garam masala 5 ml borrie 10 ml sout Swartpeper en bruinsuiker na smaak 2 kaneelstokke 2 lourierblare 125 ml wit druiwe-asyn 500 ml tuisgemaakte vleisaftreksel 250 g droëperskes, gehalveer indien baie groot
Braai die vleis in ’n groot kastrol in die olie tot bruin. Skep uit en braai die uie in dieselfde pot tot sag. Voeg die kerriepoeier, masala, borrie en sout by en braai vir 3-5 minute tot geurig. Sit die vleis terug in die pot en voeg die res van die bestanddele, buiten die droëperskes, by. Geur na smaak met swartpeper en bruinsuiker. Verhit tot kookpunt en laat prut vir 2 uur. Voeg die droëperskes by en prut vir ’n verdere 45 minute of tot die vleis baie sag is. Geur nog indien nodig. Sit voor op gestoomde basmatirys met blatjang, gesnipperde piesang en klapper en lekker vars tamatiesambal. Lewer 8 porsies.
Lamsribpasteie
Lamsrib is ’n geurige snit danksy al die vet en bene aan die vleis. Dit maak dus ’n lekker pasteivulsel, sonder dat jy nodig het om veel ander bestanddele daarby te sit. Ek hou daarvan eenvoudig gaargemaak – met net sout, peper en ’n bietjie gemaalde koljander. Aan die einde van die gaarmaaktyd, en nadat die bene verwyder is, voeg ek ’n lepel sjerrie-asyn of ’n skeut suurlemoensap by.
Broskorsdeeg
750 ml koekmeel 7 ml sout 250 g koue botter, gerasper of in klein blokkies gesny 1 groot eiergeel Yswater
Vulsel
2 lamsribbetjies, in ribstukkies gesny Sout en varsgemaalde swartpeper na smaak 15 ml fyn koljander Sjerrie-asyn of vars suurlemoensap 1 eier, geklits
Deeg: Pols die meel, sout en botter saam in ’n voedselverwerker tot krummelrig (of vryf die botter met jou vingerpunte by die meel en sout in). Voeg die eiergeel en ’n paar druppels yswater by tot daar klam frummels vorm wat aan mekaar begin vassit. Keer die mengsel uit op ’n werksoppervlak en druk bymekaar in ’n plat skyf deeg. Draai die deeg toe in kleefplastiek en verkoel vir minstens 1 uur. Vulsel: Geur die ribstukkies met sout, peper en koljander. Plaas dit saam met ’n bietjie water in ’n drukkoker en kook of stoom dit tot die vleis van die bene af val. Verwyder die bene en sny die vleis fyner. Geur met sjerrie-asyn of suurlemoensap en laat die vulsel afkoel.
Voorverhit die oond tot 190 °C en smeer ’n muffinpan met olie of bespuit die pan met kleefwerende kossproei. Rol die deeg op ’n meelbestrooide oppervlak uit en sny 8-10 groot sirkels uit (waarmee jy die boom en kante van die muffinholtes kan uitvoer). Voer die pan se holtes met die deeg uit en skep die vleisvulsel daarin. Druk die orige deeg liggies bymekaar en rol dit weer uit. Druk kleiner sirkels uit en bedek die vleisvulsel daarmee. Verseël die kante en verf die deeg met geklitste eier. Bak vir sowat 30 minute tot gaar en goudbruin. Sit die pasteie (warm of teen kamertemperatuur) voor met slaai van jou keuse. Lewer 8-10 pasteie.
Lamsnek-en-bonekasserol
Bone en ander peulgroente pas fantasties by ryk stowegeregte. Hierdie geurige kas
serol sal almal aan die tafel tevrede stel.
1 kg skaapnek, in skywe gesaag 5 ml gemaalde koljander Sout en varsgemaalde swartpeper Olie, vir braai 3 middelslag-uie, gekap 4 stele seldery, gekap 4 knoffelhuisies, fyngekap 12 ml masala 5 ml borrie 5 ml mosterdpoeier 30 ml appelkooskonfyt 3 ml elk sout en varsgemaalde swartpeper 2 stukke kassia 60 ml asyn 500 ml vleisaftreksel 400 g droë witbone, ongeveer 2 uur lank in louwarm water geweek Water Vars pietersielie en fyngerasperde suurlemoenskil, om af te rond
Voorverhit die oond tot 170 °C. Gebruik ’n skerp kombuisskêr en knip ’n paar kepe in die kante van elke stuk nek (dit keer dat die vleis opkrul wanneer dit aan hitte blootgestel word). Geur die vleis met koljander, sout en peper. Verhit ’n bietjie olie in ’n groot, oondvaste swaarboomkastrol en braai die nek in lotte in die olie bruin. Skep uit en hou eenkant.
Braai die uie en seldery in dieselfde kastrol tot die uie taamlik sag is. Voeg die knoffel, masala, borrie en mosterdpoeier by en braai vir ’n paar sekondes. Voeg die appelkooskonfyt, sout, peper, kassia, asyn en aftreksel by en verhit tot kookpunt. Prut vir sowat 5 minute. Skep dan die bruingebraaide skaapnek (en alle pansouse wat in die bord afgedrup het) in die kastrol. Maak seker die vleis is met die sous bedek. Bedek die kastrol met ’n digpassende deksel en sit dit in die oond. Bak vir 1½-2 uur of tot die skaapnek sag is.
Terwyl die kasserol bak, dreineer die bone en gooi enige gevlekte bone weg. Sit die bone in ’n kastrol met skoon water (sonder sout). (Gebruik dubbeld soveel water as bone.) Kook die bone tot dit sag is, dreineer en hou eenkant.
Haal die kasserolgereg uit die oond, voeg die bone by en gee dit ’n roer. Bedek weer en bak vir ’n verdere 30-40 minute tot die vleis baie sag is en die bone van die lekker sous geabsorbeer het.
Sprinkel gekapte pietersielie en fyngerasperde suurlemoenskil oor en sit voor met ’n styselgereg en groente of slaai van jou keuse. Lewer 6-8 porsies.
Lamstjops met speserymarinade
Dié gemarineerde tjops se geur is onverbeterlik. Ek braai dit eers in ’n riffelpan en sit dit dan vir ’n paar minute in die oond tot net-net gaar — die vleis moet nog effens pienk wees.
5 ml gemaalde koljander 5 ml fyn komyn 5 ml vinkelsaad, gerooster en fyngemaal 60 ml karringmelk of natuurlike jogurt 45 ml tamatiesous 5 ml heuning Paar druppels tabascosous Skeut vars suurlemoensap
6 dikgesnyde lamstjops Sout en varsgemaalde swartpeper Olie, vir braai
Rooster die speserye in ’ n droë pan tot geurig. Laat heeltemal afkoel en meng met die karringmelk (of jogurt), tamatiesous, heuning, tabascosous en suurlemoensap. Geur die tjops goed met sout en peper aan elke kant en pak in ’n enkellaag in ’n niemetaalbak. Giet die marinade oor die tjops en draai die tjops om sodat elkeen goed met marinade bedek is. Bedek die bak en verkoel vir minstens 1 uur (jy kan dit selfs oornag laat marineer). Haal die bak uit die yskas en laat staan buite tot dit kamertemperatuur bereik het. Voorverhit die oond tot 190 °C. Verhit ’n bietjie olie in ’n pan, haal die tjops uit die marinade en seël in die pan tot die vleis goudbruin aan elke kant is. Sit dit in ’n skoon oondbak en bak vir 15-20 minute tot gaar na smaak. Laat die vleis vir 5 minute rus en sit voor met aartappels en slaai van jou keuse. Lewer 4-6 porsies.
Koolbredie met ’n verskil
Spekvleis en vars suurlemoensap gee ’n heerlike smaak aan tradisionele koolbredie.
Olie, vir braai 500 g lamskenkels, in skywe gesaag Sout en varsgemaalde swartpeper na smaak 2 groot uie, grofgekap Water 4 aartappels, geskil en in kwarte gesny 1 pak (250 g) spekvleis, gesnipper 1 kleinerige kopkool, grofgesny Vars suurlemoensap na smaak
Verhit die olie in ’n kastrol. Geur die vleis met sout en peper en braai die skenkelskywe tot goudbruin. Voeg een van die gekapte uie by en braai tot sag. Voeg genoeg water by om die vleis te bedek en verhit tot die water stadig prut. Bedek en prut vir ongeveer 2 uur of tot die vleis net-net sag is. Voeg die aartappels by (en nog water, indien nodig) en prut vir nog 20 minute. Terwyl die aartappels gaar word, braai die ander ui en die gesnipperde spekvleis in ’n pan tot die spek gaar is. Voeg dit saam met die kool by die bredie, bedek die kastrol en prut vir nog 20 minute tot die kool gaar, maar nie papsag is nie. Geur na smaak met sout, peper en lekker baie vars suurlemoensap. Sit voor op gestoomde rys. Lewer 6 porsies.