WAT ’N TYDSKRIF!
Die heel eerste Landbou Boerekos wat ek gekoop het, was uitgawe 15. Wat ’n spesiale uitgawe met Landbouweekblad wat sy 100ste verjaarsdag vier!
Die artikel “100 jaar saam in die kombuis” was ’n leeslekkerte. Ek het myself omtrent verlustig in die artikels, om nie eens te praat van al die watertandresepte nie. Daar is behoorlik iets van alles! Só word Boerekos uitgawe 15 toe sommer ’n oulike en nuttige Kersgeskenk!
Uitgawe 15 gaan ook in my tas Februarie as ek vir my dogter in Engeland gaan kuier. Boerekos gaan beslis haar liefde vir kook opnuut laat opflikker en verseker dat sy haar
Suid-Afrikaanse erfenis sal onthou en aan haar twee dogtertjies oordra.
Baie dankie vir ’n uitstekende kostydskrif. Ek sal baie beslis van nou af nie weer een uitgawe misloop nie. SANET DU PLESSIS POLOKWANE