DU KLOOF-LODGE
As jy wil beleef hoe mooi die Du Toitskloofberge werklik is, draai van die N1 af en loer by die Du Kloof-lodge in. Die berg slaan behoorlik jou asem weg. Die foreldamme is gewild by besoekers wat graag van dié varswatervis wil inkatrol. Elke forel wat jy vang, word geweeg, en jy betaal per kilogram vir die vis. Jy kan hengelgerei huur as jy nie jou eie het nie.
Ná jy lyn natgemaak het, kan jy gaan keel natmaak in die Piscator Pub. Dit raak lekker luidrugtig wanneer daar sport uitgesaai word en dié pub bly oop tot die laaste persoon sy ry gekry het.
Dit is iets besonders om hier tyd in die natuur deur te bring, of jy wil voëls kyk (die voëllys bevat sowat sestig spesies) of een van die staproetes wil aanpak. Hoewel beginners van die roetes kan aandurf, is sommiges nogal taai en vereis ’n redelike fiksheidsvlak. Jy kry jou permit by die lodge se ontvangs. Hou maar vas daaraan, want ná die stappie word jy beloon met ’n bietjie afslag in die pub!
Die restaurantstoep bied die beste berg-enrivieruitsig. Hier kan jy forelgeregte of iets meer tradisioneel bestel, soos hoenderpastei, bobotie of gekrummelde varknek. As jy meer as ’n daguitstappie daarvan wil maak, bespreek betyds verblyf in die lodge. Jy kan kies uit kamers en chalets, en selfs slaapsale. KONTAKBESONDERHEDE: N1-snelweg
(’n paar kilometer ná die Hugenote-tonnel). Bel 060 563 2694 of stuur e-pos na info@ duklooflodge.co.za