DIE VET SPENS
Moenie dat die eenvoudige voorkoms van dié padstal jou flous nie. Dit is eerder ’n geval van dinamiet wat in klein pakkies kom. Die padstal bars uit sy nate met heerlike, mooi verpakte ingelegde produkte, vars tuisgebak en droëvrugte. Die meeste hiervan kom uit die eienaar, Elana Lategan, se plaaskombuis. Ons was gelukkig genoeg om van haar pekanneuttertjies raak te loop en in die yskas was bakkies met heerlike Peppermint Crisp-tert en Cremoratert. Seisoentyd kan jy vars produkte soos pruime en perskes, en as jy baie gelukkig is, soet Hanepoot, hier koop.
Die pryse is baie billik – wanneer laas het jy R7 vir ’n muffin, R25 vir ’n sakkie met basieliekruid-pesto of R50 vir ’n pak ontbytbeskuit betaal? KONTAKBESONDERHEDE: R43-pad (by die R43- en Breërivier-kruising). Bel 082 877 5908.