Pa Ron se rissieblatjang

Om hierdie rissieblatjang te maak, het jy baie tyd en geduld nodig. Dit neem lank en jy moet deurlopend jou oog op die pan hou en gereeld roer om te keer dat dit aanbrand. Maar dis oor en oor die moeite werd! Sit die rissieblatjang voor as deel van ’n kaasbord of gebruik ’n paar lepels daarvan om enige vaal of vervelige sous, stowegereg of bredie skop te gee.

4 hande vol rooi en groen brandrissies 3 groot uie

Water

500 ml olyfolie

375 ml witasyn

75 ml witsuiker

4 lourierblare

Kap die brandrissies (met pitte en al) saam met die uie goed fyn in ’n voedselverwerker. Skep alles in ’n groot pan en voeg net genoeg water by om die rissies te bedek. Verhit tot kookpunt en laat liggies kook vir ongeveer 15 minute, terwyl aanhoudend geroer word. Voeg die olyfolie by en en braai stadig, terwyl geroer word, vir ongeveer 1 uur. Voeg die witasyn, suiker en lourierblare by en verhit weer tot kookpunt. Prut, en roer, vir nog 20 minute tot ’n skepbare sous gevorm het. Bottel die rissies warm in gesteriliseerde flesse en verseël met gesteriliseerde deksels.

Lewer 8-10 klein flessies rissieblatjang.