Heuning-bierbroodjie
Op Kirabo word nie net wyn gemaak nie, maar ook besonder lekker bier gebrou deur die Le Roux-seuns, onder die gepaste naam Broers Brew. Jy kan ligte of donker bier vir die broodjie gebruik. Karen speel graag tennis en sy sê die broodjie is onverbeterlik saam met ’n yskoue bier ná ’n tenniswedstryd. Die veelsydige broodjie is ewe lekker met ’n sout of soet smeer. Ons het dit geproe met ’n smeer van mascarpone, geklop met ’n bietjie suurlemoensap en heuning, asook met plaasbotter
en kaas. Albei weergawes is smullekker.
750 ml bruismeel
5 ml sout
45 ml bruinsuiker
100 ml heuning 1 botteltjie (375 ml) bier
Voorverhit die oond tot 165 °C en smeer ’n middelslag-broodpan (of ’n paar klein pannetjies, vir individuele broodjies) met olie. Meng die bruismeel, sout en bruinsuiker in ’n mengbak en voeg die heuning en bier by. Meng goed saam en skep in die voorbereide pan(ne). Bak vir ongeveer 45 minute, of tot ’n toetspen skoon uit die hoogste deel van die brood kom. Laat die brood vir sowat 10 minute in die pan afkoel en keer uit op ’n draadrak. Sit louwarm of teen kamertemperatuur voor met smere van jou keuse.
Lewer 1 middelslag-brood of
6-8 individuele broodjies.