Maklike bloubessiemuffins
Die muffins is nie baie soet nie en die bloubessies daarin maak dit lekker klam. Geen versiersel is dus nodig nie. In buiteseisoenstyd gebruik ek bevrore bloubessies en voeg dit net so by die beslag. Dan het die muffins net ’n ekstra minuut of twee in die oond nodig.
625 ml bruismeel
180 ml ligbruinsuiker
180 ml melk
1 ekstragroot eier
125 ml olie
5 ml vanieljegeursel
250 ml vars bloubessies
60 ml hawermout
Paar ekstra bloubessies, vir bo-op
Voorverhit die oond tot 180 °C en voer ’n standaardmuffinpan met papiervormpies uit. Bespuit die vormpies liggies met kleefwerende kossproei. Meng die bruismeel en suiker in ’n bak. Klits die melk, eier, olie en vanieljegeursel saam en voeg dit by die droë bestanddele. Roer die mengsel twee of drie keer, tot alles nog nie goed deurgemeng is nie, en voeg dan die bloubessies by. Vou in tot net gemeng. Verdeel die mengsel tussen die papiervormpies en sprinkel ’n bietjie hawermout op elke muffin. Druk ’n paar bloubessies in die hawermout en bak die muffins vir ongeveer 20 minute tot deurgaar. Laat vir ’n paar minute in die pan afkoel en pak op ’n draadrak om verder af te koel. Lewer 12 muffins.