Wildsvleisbredie met lemoen
Probeer ’n slag iets nuuts met wildsvleis.
1,3 kg stowewildsvleis, in blokkies gesny
Sout en varsgemaalde swartpeper na smaak 10 ml koljander
10 ml komyn
5 ml kaneel
45 ml olyfolie
2 uie, grofgekap of in wiggies gesny 4 knoffelhuisies, fyngekap
1 liter water
250 ml vars lemoensap
Heuning na smaak
Fyngerasperde lemoenskil en vars, gekapte pietersielie, om af te rond
Sit die vleis in ’n mengbak en geur goed met sout en peper. Rooster die koljander, komyn en kaneel droog in ’n pan. Sprinkel dit oor die vleis en meng dit goed deur met jou hande. Verhit die olie in ’n groot swaarboomkastrol en braai die vleis in sarsies daarin tot bruin. Voeg die uie en knoffel by en braai tot die uie begin sag word. Voeg die water by. Verhit tot kookpunt en verlaag die temperatuur sodat die bredie saggies prut. Prut stadig vir 1½ uur of tot die vleis sag is. (Voeg nog water by as dit lyk of die bredie gaan droog kook.) Voeg die lemoensap by en prut vir nog 15-20 minute tot die sous geurig en afgekook is. Geur na smaak met sout, peper en ’n paar druppels heuning. Rond die bredie af met fyngerasperde lemoenskil en gekapte pietersielie. Sit voor op koeskoes of krummelpap.
Lewer 6-8 porsies.