Klassieke Hertzoggies
Dié goeie boerekostreffer kan jy nie sonder eiers maak nie. Die eiergeel verleen rykheid en sagtheid aan die deeg en die wit sorg vir die kenmerkende goudbruin klappermeringuelagie bo-op. Omdat daar in die Breedekloof ook met appelkose geboer en fluks konfyt gekook word, pas die koekies net nog beter by die omgewing in. Onthou, hoe varser die eiers, hoe lekkerder die Hertzoggies!
Deeg
500 ml koekmeel
10 ml bakpoeier
Knippie sout
25 ml strooisuiker
120 g yskoue botter, gerasper 3 ekstragroot eiers, geskei 40 ml koue water
Vulsel en bolaag
375 ml appelkooskonfyt 200 ml strooisuiker 400 ml fyn klapper
Voorverhit die oond tot 180 °C en smeer of bespuit twee vlak tertpannetjies (met 12 holtes elk). Sif die meel, bakpoeier en sout saam en voeg die strooisuiker by. Vryf die botter daarby in tot die mengsel krummelrig is. Klits die eiergele en koue water liggies saam en voeg by die meelmengsel. Maak aan tot ’n deeg. Rol die deeg dun uit op ’n meelbestrooide oppervlak en druk 16-18 sirkels uit wat groot genoeg is om die boom en kante van die tertpannetjies se holtes bedek. Voer 16-18 holtes met die deegsirkels uit. Skep ’n teelepel appelkooskonfyt in elke deegdoppie.
Klits die eierwitte tot stywe punte vorm, maar wees versigtig om dit nie te lank te klits nie (tussen sagte- en stywepuntstadium
is ideaal). Voeg nou die strooisuiker lepel vir lepel by en hou aan klits tot die suiker opgelos en die mengsel blinkwit is. Vou die klapper hierby in. Skep eetlepels vol van die mengsel op die appelkooskonfyt en smeer dit effens na die kante toe, sodat die tertjie daarmee bedek is. (Jy kan ook ’n spuitsak gebruik om die klappermeringue op die konfyt te spuit.) Bak die tertjies vir ongeveer 20 minute tot goudbruin en deurgaar. Lewer 16-18 Hertzoggies.