Vis in veerligte bierbeslag
Dit was die Britte se liefde vir gebakte vis en skyfies wat die sjef Jamie Oliver ’n resep laat ontwikkel het vir die beste bros beslag vir die vis. Die geheim vir ’n opgepofte, bros deeglagie, het Jamie uitgevind, is niks anders nie as ’n paar styfgeklopte eierwitte. Ek het sy idee gebruik en geklopte eierwitte by ’n doodgewone bierbeslag ingevou voor die vis daarin gedoop is – dit maak die wêreld se verskil.
Bierbeslag
250 ml bruismeel 3 ml sout
250 ml bier 3 eierwitte, styfgeklits
Olie, vir braai
4 witvisfilette, goed gegeur met sout en peper Sout en suurlemoenwiggies, om voor te sit
Meng die bruismeel en sout vir die beslag in ’n bak. Voeg die bier by en meng deur. Vou die styfgeklitste eierwitte versigtig in. Verhit die olie tot goed warm. Doop die visfilette in die beslag en maak seker dit is oraloor bedek. Braai die filette vir ’n paar minute in die warm olie tot bros en goudbruin. Skep uit en dreineer op kombuispapier. Geur met sout en vars suurlemoensap en sit dadelik voor met bros aartappelskyfies.
Lewer 4 porsies.