Flatervrye meringue
Ek gebruik hierdie beproefde resep al jare lank as ek harde, bros meringue wil maak, soos klein skuimpies of groot sirkels vir ’ n laag-op-laag-meringuenagereg of -koek. Dit flop nooit nie en hou lank as jy dit lugdig verpak.
8 vars, ekstragroot eierwitte, teen kamertemperatuur
Knippie sout
336 g strooisuiker
336 g versiersuiker
Kllits die eierwitte saam met die knippie sout tot stywe punte vorm. Voeg die strooisuiker lepel vir lepel by en hou aan klits tot al die suiker bygevoeg en die mengsel dik en blinkwit is. Sif die versiersuiker oor en vou dit by die meringuemengsel in (of klits dit stadig deur).
Voorverhit die oond tot 100 °C en voer vier bakplate met bakpapier uit. Bespuit liggies met kleefwerende kossproei. Spuit of skep die meringue in verlangde vorms op die uitgevoerde bakplate. Sit dit in die oond en bak vir 1-1½ uur.
Skakel die oond af en laat die meringues in die oond afkoel tot kamertemperatuur.
Lig die meringues van die bakplate af en bêre in ’n lugdigte houer.
Lewer ongeveer 60 skuimpies of
3-4 groot meringuesirkels.