Oondgeroosterde plathoender met sitrusmarinade en patats
1 heel hoender
Sitrusmarinade
15 ml komyn
3 ml paprika
10 ml fyngerasperde lemoenskil 125 ml varsuitgedrukte lemoensap 80 ml heuning
30 ml olyfolie
3 knoffelhuisies, fyngedruk
Sout en varsgemaalde swartpeper na smaak 6 kleinerige patats, in wiggies gesny
Verwyder die hoender se binnegoed en alle stukke sigbare vet. Sit die hoender op sy rugkant neer. Knip weerskante van die borsbeen met ’n skerp kombuisskêr en verwyder die been. Vou die hoender oop, draai om en druk dit op die rugkant met jou hand plat. Sit die plat hoender in ’n groot, verseëlbare plastieksak. Meng die komyn, paprika, lemoenskil en -sap, heuning, olyfolie en knoffel goed saam. Giet oor die hoender in die sak en verseël lugdig. Laat die hoender vir minstens 2 uur in die yskas marineer, maar verkieslik oornag.
Voorverhit die oond tot 190 °C. Haal die hoender uit die sak en sit dit in ’n roosterbak. Geur goed met sout en peper en rangskik die patatwiggies rondom. Bedruip met die marinade uit die sak. Oondrooster vir ongeveer 70 minute of tot deurgaar. (As die hoender te donker raak, bedek met foelie. As die marinade te min raak of in die bak wil brand, gooi ’n bietjie water by.) Lewer 6 porsies.