Pestohoender
Vars pesto hou nie baie lank in die yskas nie, maar as ek ’n oorvloed vars kruie het, maak ek ’n groot hoeveelheid en vries dit in klein porsies (ysbakkies wat ek met stukkies kleefplastiek uitvoer, werk goed). Ek ontvries die blokkies pesto wanneer ek dit nodig kry en gebruik dit in enigiets van souttert tot stowegeregte, op pizza of in slaaisous. Bevrore kruiepesto het nie dieselfde heldergroenkleur van vars pesto nie. Daarom gebruik ek dit in ’n gereg wat gebak moet word, soos hierdie hoender, of in ’n sous.
8 hoenderporsies
Sout en varsgemaalde swartpeper na smaak Olie, vir braai
2 groot uie, in wiggies gesny
45 ml basiliepesto
Sap van 1 groot suurlemoen
Olyfolie, om oor te sprinkel
Vars basiliekruidblare en gerasperde parmesaankaas, om af te rond
Geur die hoenderporsies met sout en peper en braai elke porsie in ’n bietjie olie in ’n swaarboompan bruin. Rangskik die hoenderporsies en uiewiggies in ’n oondbak. Meng die pesto en suurlemoensap en skep oor die hoender. Bedruip met ’n bietjie olyfolie en geur liggies met sout en peper. Bedek die hoender met foelie en bak vir 40 minute. Haal die foelie af en bak verder oop tot die hoender se vel goudbruin en die porsies sag, sappig en deurgaar is. Rond af met vars basiliekruid en gerasperde parmesaankaas. Sit voor met koeskoes of rys om die lekker pestosous mee te geniet. Lewer 4-6 porsies.