Aspersiepoffertjies met soutkaramel-tiemiesous en vars kruisement
Poffertjies
1 bossie (ongeveer 300-400 g) vars aspersies Water
Sout na smaak
125 ml bruismeel, plus ekstra indien nodig Olie, vir diepbraai
Soutkaramel-tiemiesous
250 ml strooisuiker
500 ml room
1 ml sout
5 ml fyngekapte vars tiemieblaartjies
60 ml vars kruisement, in dun repies gesny, om af te rond
Poffertjies: Kook die aspersies in vinnig-kokende water met ’n bietjie sout vir 30 sekondes. Dompel die aspersies in yswater en dreineer. Puree die aspersies met ’n staafmenger of in ’n voedselverwerker tot glad.
(Jy kan ’n paar druppels water by die aspersies voeg om dit makliker te maak om dit fyn te maak tot ’n puree, maar nie te veel water nie.)
Voeg die helfte van die bruismeel by die
aspersiepuree en roer deur. Voeg nou die res van die meel bietjie vir bietjie by tot ’n dik skepbare beslag vorm. (Dit mag nodig wees dat jy ’n lepel of twee ekstra meel moet byvoeg om ’n skep-beslag te verkry.)
Diepbraai lepels vol van die beslag in warm olie tot opgepof, goudbruin en deurgaar. Gebruik ’n lepel of vurk om die bolletjies in die olie om te draai, sodat dit egalig gaar word. Dreineer op kombuispapier. Toets met ’n tandestokkie om te kyk of die poffertjies deurgaar is.
Sous: Gebruik ’n kleefwerende swaarboompan en skep die suiker in ’n egalige laag daarin. Verhit, sonder om te roer, tot die suiker begin smelt. Draai en kantel die pan sodat die suiker egalig smelt en nie begin kook voor alle suikerkristalle opgelos is nie. Sodra die suiker ’n karamelkleur kry, voeg die room in ’n dun straaltjie by, terwyl jy roer. Plaas die pan terug op die hitte en verhit, terwyl jy roer tot glad. Voeg die sout en tiemie by en roer deur. Pak die poffertjies op ’n mooi bord. Bedruip met ’n bietjie van die soutkaramelsous en sprinkel fyngesnyde vars kruisement oor. Sit voor met die res van die sous. Lewer 4 porsies.