OM MET ’N JAGTER GETROUD TE WEES
Marétha Griessel, Jacobus en Marthinus se ma, moes gou-gou leer om ’n paar planne met wildsvleis te maak.
“Hul pa het ook altyd gejag en omdat die mans so lief is vir jag, moes ons eenvoudig leer vleis werk. Dit het net te duur geraak om net biltong en droëwors te maak. Ons moes dus die vleis reg begin benut.
“Dis ook so gesond!” vertel dié oudhuishoudkundige.
“Ek het al báie vleis in my lewe gewerk.” Alles wat sy met vleis doen, doen sy met wild ook. Van haar gunsteling-wildsvleisresepte het sy by ’n tannie Meisie van Aranos gekry. Dis geregte soos wildsvleispot met dungesnyde wildsfilet, spek en sampioene, of “velletjiesvleis” — wildschnitzel wat in room gebak word.