Marétha se wildsvleisosso bucco met gremolata
2 kg wildskenkels, in skywe gesaag
Sout, varsgemaalde swartpeper en gestampte koljander na smaak
Olyfolie
1 groot ui, in skywe gesny
15 ml beesvleisaftrekselpoeier
2 takkies vars tiemie
2 lourierblare
150 ml rooiwyn
Water
2 stele seldery, in 2 cm-stukke gesny
4 wortels, geskraap en in dik ringe gesny 1 blik (410 g) gekapte tamaties 30 ml tamatiepasta
45 ml bruinsuiker
Gremolata
Fyngerasperde skil van 1 suurlemoen 3 knoffelhuisies, gekap
4 takkies pietersielie, gekap
Voorverhit die oond tot 160 °C. Geur die vleis met sout, peper en gestampte koljander. Verhit die olyfolie in ’n groot, oondvaste kastrol en verbruin die vleis in lotte daarin. Skep die vleis uit en braai die ui in dieselfde pot tot sag. Skep die vleis (en
alle pansouse) terug in die kastrol en voeg die aftrekselpoeier, tiemie, lourierblare en rooiwyn by. Voeg genoeg water by om die vleis te bedek. Bedek en bak die vleis in die oond vir ongeveer 3 uur of tot sag. (Kyk nou en dan dat daar nog genoeg water in die kastrol is en vul dit aan indien nodig, anders raak die skenkels droog en taai.)
Wanneer die vleis baie sag is, skep dit met ’n gaatjieslepel uit die vloeistof. Voeg nou die seldery, wortels, tamaties en tamatiepasta by. Verhit tot kookpunt en prut tot die groente sag en die sous effens verdik is. Geur die sous met ’n bietjie bruinsuiker, indien nodig, om die geurbalans reg te kry. Skep die vleis terug in die kastrol en kook vir oulaas stadig deur.
Meng die bestanddele vir die gremolata saam en sprinkel oor die osso bucco net voor opdiening. Lewer 8 porsies.