Pasta met seekos en soetrissies in paprika-tamatiesous

125 g spekvleis, fyngesnipper

15 ml olyfolie

2 rooi-uie, dun gesny 4 knoffelhuisies, fyngekap

1 rooi brandrissie, fyngekap

2 rooi soetrissies, in dun repies gesny

10 ml gerookte paprika 2 blikke (410 g elk) gekapte tamaties

10 ml suiker

Sout en peper na smaak Water

350 g steurgarnale, skoongemaak en afgedop 350 g mengsel van calamarirepies en -tentakels 500 g gaar pasta van jou keuse

Braai die spekvleis in die olyfolie tot gaar. Voeg die uie, knoffel, brandrissie en soetrissies by en braai stadig oor lae hitte tot amper sag, maar nie pap nie. Voeg die paprika by en braai vir ’n paar sekondes. Voeg die tamaties en suiker by. Geur na smaak met sout en peper. Maak een van die tamatieblikke vol water en voeg dit ook by. Prut die tamatieen-soetrissiesous stadig oor lae hitte vir sowat 20 minute, tot dit geurig en effens afgekook is.

Skep die seekos op die sous en roer dit een keer liggies deur. Prut vir ongeveer 3-4 minute, of tot die seekos net gaar is. Geur weer na smaak met sout en peper. Sit dadelik voor op die pasta.

Lewer 6 porsies.

Sakkie Viljoen boer saam met sy pa op hul familieplaas, Rietvlei, in die distrik Robertson – ’n beroep wat hy as ’n voorreg beskou. Die Viljoens is soetrissiespesialiste, maar produseer ook ander rissiesoorte.

Hoe verloop die produksieproses van soetrissies?

Ons plant van September af en begin dan Desember oes. Oestyd hou tot so einde Mei aan. Ons kan dus binne twaalf tot veertien weke nadat ons geplant het, ons eerste soetrissies afhaal.

Watter soort rissies verbou julle?

Ons produseer rooi, groen en geel soetrissies, asook ’n verskeidenheid brandrissies. Die geel en rooi soetrissies bied baie groter uitdagings as die groenes. Ons produseer ook baie meer groen soetrissies omdat die vraag daarna heelwat groter is.

Hoekom gebruik julle nethuise?

Ons gebruik die nette om die rooi en geel soetrissies te produseer. Die verkleuringsproses verg baie van ’n plant, en die nette skakel die ergste klimaatskommelinge uit. Die plant stres dan minder en kry kans om die soetrissies enduit te laat verkleur.

In watter klimaat floreer soetrissies? Soetrissies is baie sensitief vir klimaatuiterstes. Die plante verkies temperature wat wissel van 24 ° C tot 32 ° C. Hulle hou ook van hoë humiditeit.

Lewer die plante goeie opbrengste?

Dit is baie interessante plante. Hoe meer aandag jy aan ’n soetrissiestoel gee, hoe beter sien hy na jou om. Dis amper soos ’n vroumens!

Doen julle enige waardetoevoeging?

Ons verpak alles self op die plaas onder ons handelsmerk, Viljoen Boerdery. Die meerderheid van ons produkte word egter in die kettingwinkels se eie verpakkingsmateriaal gepak.

Is daar probleme?

Die rissies verg aanvanklik baie hoë produksiekoste. Dan duur dit drie tot vier maande voor jy ’n produk oes, wat jy dan aan ‘n beperkte mark met wisselvallige pryse moet verkoop.

Wat is jou gunstelinggereg waarin soetrissies voorkom?

Pizza!

Stéfan du Plessis het grootgeword op Elandsrivier, ’n plaas in die Warm Bokkeveld waar hulle onder meer appelkose (20 ha) droog. Onlangs het hy ook Mon Don-landgoed by Robertson bekom, waar hy appelkose (3 ha) vir die vars mark produseer.

Watter voordele hou dit in om op twee plekke met appelkose te boer?

Die Warm Bokkeveld kry nie reën in die somer nie, maar die winters is kouer.

Die kultivars waarmee ons daar boer – Soldonné en Bebeco – het hoër kouebehoeftes en is spesifiek vir die droogmark geteel. Robertson het ook droë somers, maar nie so baie winterkoue nie. Die appelkose op Mon Don – Imperial en Charisma – is dus vroeër ryp, wat ons in staat stel om ons appelkoosseisoen te rek. Ons begin vroeg in November daar pluk en maak dan later klaar op Elandsrivier. Gewoonlik pluk ons die laaste appelkoos op 31 Desember!

Is dit waar dat die wêreldwye appelkoosbedryf krimp?

Dit is ongelukkig so. Ons boer nog met dieselfde kultivars wat my pa 20 jaar gelede geplant het. Daar het nog nie beter kultivars na vore gekom nie. Die mark vra vir appelkose met ’n mooi rooi wangetjie, wat ons nog nie op die oomblik het nie. Die rede vir die afname het dus te make met teelmateriaal. ’n

Appelkoos is ook ’n moeilike kalant wat maklik sag word en daarom mooi opgepas moet word.

Hoekom glo jy steeds in appelkose as boerderygewas?

Ons is óf baie dom óf baie slim, maar my familie is mal oor appelkose. My oupa het al destyds begin om appelkose te droog en my pa het al die jare daarmee geboer. Ons kry steeds goeie produksies, al is die kultivars oud. Appelkose – veral inmaakkultivars – is soms geneig tot alternerende drag, maar ons produksies is jaar ná jaar goed. Ons reken dis ’n fantastiese produk waarmee ons nog ’n geldjie kan verdien. Ons is ook ingerig daarvoor om appelkose te kan droog.

Hoe voeg julle waarde toe?

Ons droog alles self en pak die vars appelkose uit Robertson ook self. Só maak ons seker kneusings word tot die minimum beperk. Plaaslik versprei ons vars appelkose onder die Cape Fresh Produce-handelsmerk na Freshmark.

Vertel van jul Appelkoosfees wat jaarliks op 16 Desember plaasvind? Ons stel van ons boorde oop sodat mense hul eie appelkose kan pluk en dan per gewig daarvoor betaal. Verlede jaar het ons 2 ton appelkose só verkoop. Mense is mal oor die plaasgevoel en geniet die dag saam met hul kinders.