Karoolamsboud met knoffel-enboegoevulsel en platperskes
Dié resep is deur die bekende sjef Mynhardt Joubert ontwikkel.
1 groot lamsboud 10 knoffelhuisies
Hand vol boegoeblare Sout en swartpeper 60 ml geskroeide koljander
1 bottel (750 ml) witwyn 500 ml lamsaftreksel 4 uie, in kwarte gesny ’n Paar takke roosmaryn en konfettibos 8 platperskes
Olyfolie
Voorverhit die oond tot 160 °C. Maak met ’n skerp mes diep kepe in die vleis en stop dit met die knoffel en boegoeblare. Vryf die boud goed in met sout, peper en koljander. Plaas in ’n diep oondskottel en giet die wyn en aftreksel oor. Sit die uie saam in die oondskottel. Bedek en bak vir ongeveer 1½-2 uur tot die vleis sag is. Haal uit en laat afkoel.
Gooi die oorblywende pansouse deur ’n sif en kook af tot daar 250 ml vloeistof oor is. Vleg ’n krans van roosmaryn en konfettibos en sit dit in ’n oondvaste bak. Verf die platperskes met olyfolie en rooster in ’n riffelpan vir ’n paar minute. Sny die vleis in skywe en pak dit in die middel van die krans. Pak die platperskes bo-op. Gooi die pansouse oor en bak verder vir omtrent 10-12 minute tot die vleis deurwarm is. Lewer 8 porsies.