Geroosterde bababeeten-kaasslaai

Dié slaai smaak lekker saam met geroosterde hoender- of varkvleis.

Slaai

12 bababete, gaargekook

45 ml heuning

45 ml olyfolie

Sout en swartpeper

3 ml fyn komyn

2 groot hande vol roketblare

250 g buffelmelkmozzarella, in growwe stukke geskeur

200 g sagte fetakaas, grofgekrummel

Groot hand vol pitlose rosyne

100 g geroosterde haselneute of amandels, grofgekap

Slaaisous

45 ml appelsap

45 ml olyfolie

45 ml appelasyn

Sout en varsgemaalde swartpeper na smaak 5 ml heelkorrelmosterd

Voorverhit die oond tot 200 °C. Pak die gaar bababeet in die oondbak. Klits die heuning en olyfolie liggies saam en bedruip die beet daarmee. Besprinkel met sout, peper en komyn en oondrooster vir ongeveer 15 minute of tot die beet gerooster en die sous gekaramelliseer is. Haal uit die oond en laat afkoel. Pak die roket op ’n opdienbord en skep die beet (en die stroop wat gevorm het terwyl dit gerooster het) oor. Sprinkel die twee soorte kaas en die rosyne oor. Klits die bestanddele vir die slaaisous liggies saam en skep ’n bietjie daarvan oor die slaai. Sprinkel geroosterde neute oor en sit voor. Lewer 4 porsies.