Wyn en samesyn om Opstal se tafel
aar is altyd báie kos op haar tafel, altyd genoeg. “En dit lyk nooit of dit vir haar moeite is nie,” vertel Attie Louw, wat baie lief is vir sy ma, Ria, se skaapkerrie, beesstert en lamskenkels. Hy eet nog die meeste middae aan sy ma se tafel.
“My uitdaging is om smiddae hier groot te eet en vanaand wéér by die huis!” skerts hy.
Ria is gaande oor wat sy “geleentheidskos” noem, en op Opstal, die familie se wynlandgoed in die Slanghoekvallei, kry sy genoeg kans om te onthaal en mense met haar lekker kos te bederf.
“Dit klink seker snaaks, maar hoewel my ma fantastiese kos gekook het, was ek nooit saam met haar in die kombuis nie,” sê Attie. “My broer, Zak, het baie beter kos gemaak as ek.”
Ria was self nie altyd so tuis in die kombuis nie.
“Ek het liewer naaldwerk gedoen, dan het my ma gesê: ‘Jy gaan eendag nie eers rys kan kook nie.’”
Toe Ria destyds met Stanley Louw getroud is, het sy egter sy aan sy met haar skoonma, Ansie, in die kombuis gewerskaf.
“Sy het my laat skilferdeeg maak … my hande is warm, dis wat skilferdeeg nie wil hê nie, maar dan moet ons soggens 04:00 onder daardie akkerboom staan, want daar moet pasteie gebak word!”
Dis juis hierdie saamdoen, saamwerk en saamleef op Opstal wat Ria koester.
Opstal se geskiedenis strek terug