BRUINPAPIERSAK, LOUOOND OF PIESANGS – STEEK DAAR WAARHEID IN DIÉ RYPMAAKSTORIES?

Avokado’s is, net soos mango’s en piesangs, klimakteriese vrugte. Dit beteken die vrugte raak volwasse aan die bome, maar eers ryp ná dit gepluk is. Avokado’s kan tien tot veertien dae neem om ryp te word. Die gereed-om-te-eet avokado’s wat jy in kettingwinkels koop, het tyd in rypmaakkamers deurgebring om die rypwordingstyd te verkort. Wanneer dit op die winkelrak beland, is dit die ideale rypheid om dadelik tuis te geniet.

Met harde avokado’s, aan die ander kant, is dit die verbruiker se verantwoordelikheid om die avokado’s self ryp te maak. Ongelukkig raak alle avokado’s nie gelyktydig ryp nie, dus kan probleme met gehalte opduik.

“Daar is baie verwarrende boodskappe oor hoe ’n mens met avokado’s moet werk. Die meeste daarvan is gegrond op harde avokado’s. Wat Viavi, of enige rypgemaakte avo betref, is dit die beste om dit onmiddellik ná jy dit gekoop het, in jou yskas te bêre. Die vrugte het ’n taamlike rakleeftyd, maar probeer om dit te eet voor dit die verkoopsdatum bereik. As dié datum verstryk, kan jy nie die produk die skuld gee as dit verby sy beste is nie,” sê Zander Ernst van die Allesbeste-boerdery.

Wat nie-rypgemaakte avokado’s betref, is dit die beste om dit in ’n warmer plek in jou kombuis of spens te bêre.

“Avokado’s word ryp tussen 16 °C en 20 °C. Soek dus maar die warmer hoekie waar daar meer latente hitte is. Dit help ook om avokado’s tussen piesangs of appels te sit wat etileen afskei, want dit help beslis met die rypwordingsproses.”