KOBUS DE BEER BRANDRISSIEBOER
VINNIGE VRAE
Buiten gewasse soos suikermielies, groenbone, babagroente en soetrissies boer julle ook met brandrissies. Watter geleenthede bied brandrissies?
Dit is ’n gewas wat goed aard in ons omgewing en die klimaat stel ons in staat om dit heeljaar te produseer. Dit is belangrik om voortdurend produkte beskikbaar te hê as jy aan kettingwinkels wil verskaf.
Met watter soorte rissies boer julle?
Ons verbou kultivars soos Serrano, Jalapeño, Cayenneen Bird’s Eyerissies. Ons kweek dit alles op oop landerye, want tonnels is ’n duur manier van boer en rissies is nie winsgewend genoeg om dit te regverdig nie.
Is dit ’n moeilike gewas om te produseer?
Enige gewas het sy uitdagings en rissies is geen uitsondering nie. As dit uitermatig koud word, kan dit ons produksie kniehalter. In die somer is insekbekamping weer ’n probleem.
Is die rissiebedryf groot in Suid-Afrika, of is dit net ’n handjie vol boere wat dit produseer?
Daar is ’n relatief klein mark in SuidAfrika vir brandrissies. Enige oorproduksie beteken dat die pryse skerp
daal. Ons plant dus net genoeg om aan ons kontrakte te voldoen. Omdat ons met die groot kettingwinkelgroepe sake doen en hulle sowat 90% van ons produkte koop, is ons markte darem baie stabiel. Die varsproduktemarkte in die stede se pryse kan egter baie wisselvallig wees.
Is julle by die waardeketting betrokke?
Ons verpak en vervoer self al ons produkte na ons klante in die stede.
Tot watter mate is meganisasie moontlik, of is dit ’n arbeidsintensiewe gewas? Waar moontlik, gebruik ons werktuie om plae en onkruid in toom te hou. Rissies word egter steeds met die hand geplant, geoes en verpak, wat dit ’n uiters intensiewe gewas maak.
Hou jy van kos met ’n bietjie skop?
Nee! Ek is glad nie gek na kos wat brand nie.