Ryk & lekker
Wie hou nie van ’n beker romerige warmsjokolade nie? Hierdie manier om die drankie te maak is ’n lekker projek om saam met jou kinders oor ’n naweek aan te pak en die eindresultaat is smullekker! Dit is net so ’n gawe geskenk.
Warmsjokoladebomme
My tienjarige het met die idee vir hierdie bederf by die huis aangekom en ons moes dit opsluit probeer. ’n Treffer!
150 g donker- of melksjokolade van goeie gehalte, fyngekap 100 ml gerasperde sjokolade 80 ml warmsjokoladepoeier 125 ml wit mini-malvalekkers 50 g witsjokolade, fyngekap Warm melk, om voor te sit
STAP 1
Smelt die donker- of melksjokolade oor lae hitte of in die mikrogolf teen 30% krag tot glad. Klits die sjokolade goed en laat staan vir 15 minute. Smelt dit nou weer tot glad. Verf die binnekante van geskikte koepelvorms met die gesmelte sjokolade (ons het sommer die deksels gebruik wat saam met kolwyntjiehouers verkoop word). Maak seker jy gebruik vorms van plastiek of silikoon omdat die sjokolade nie maklik sal uitkeer as jy ’n soliede vorm van byvoorbeeld glas of metaal gebruik nie.
STAP 2
Laat die sjokolade heeltemal hard word voordat jy die sjokoladedoppe uit die vorms uitkeer. Maak ’n droë pan warm oor ’n stoofplaat. Haal die pan van die hitte af en sit dit op ’n houtplank neer. Werk baie versigtig – sit die helfte van die sjokoladedoppe liggies op die pan neer om die ongelyke rande glad en gelyk te smelt. Nie te lank nie, anders sal die sjokolade smelt.
STAP 3
Vul die halwe doppe waarvan die rande reeds glad gemaak is, met ’n skeppie gerasperde sjokolade, ’n skeppie warmsjokoladepoeier en ’n paar minimalvalekkers. Neem nou die res van die sjokoladedoppe en smelt die rande een vir een op die warm pan. Sodra die rande gesmelt en gelyk is, pas dit op een van die gevulde doppe. Die gesmelte sjokolade op die boonste dop sal genoeg wees om die twee helftes aan mekaar te seël.
STAP 4
Sodra die sjokoladebomme klaar is, pak dit versigtig op ’n uitgevoerde bakplaat. Smelt die fyngekapte witsjokolade oor lae hitte tot glad. Skep die gesmelte witsjokolade in ’n plastieksakkie of spuitsak en knip ’n baie klein puntjie voor af. Versier die sjokoladebomme met witsjokolade en laat staan tot die sjokolade hard is. Verpak en bêre in ’n lugdigte houer op ’n koel plek tot benodig.
STAP 5
Om te gebruik, sit ’n sjokoladebom in ’n vuurvaste glas of beker. Giet stoomwarm melk daaroor tot die sjokolade begin smelt. Roer tot die gerasperde sjokolade en warmsjokoladepoeier in die melk oplos en die minimalvalekkers op die warm melk dryf en begin smelt. Geniet dadelik dié sjokoladelekkerte. Lewer ongeveer 12 warmsjokoladebomme.