SÓ SÊ ’N KOFFIEBOER
Die innoverende Cumming-familie van die Beaver Creek-koffielandgoed in KwaZuluNatal is al sedert die 1980’s sinoniem met koffieproduksie. Nie net bedryf hulle koffieplantasies nie, maar voer ook koffie in, rooster die bone en werk met plaaslike koffieboere. Dylan Cumming is deel van die derde geslag wat dié boerdery voortsit en sorg dat verbruikers heerlike plaaslike koffie kan skink.
Beaver Creek is die wêreld se suidelikste koffielandgoed. Wat het jou familie se belangstelling in koffiebone aangevuur? Koffie is in ons bloed! My ouers en grootouers het in die 1980’s met koffie begin boer toe die piesangprys gestagneer en siektes hulle oortuig het om na iets anders te kyk. Hulle het ’n koffieplantasie as proeflopie gevestig. Ek en my broer het in 1999 by die onderneming aangesluit. Koffie is een van daardie produkte waaroor ’n mens regtig passievol raak. Daar is soveel om te leer, vaardighede om te ontwikkel en ervarings om te geniet.
Min mense besef daar word koffiebone in Suid-Afrika verbou. Wat is die potensiaal van die plaaslike bedryf, as ’n mens die klimaat en ander toestande in ag neem?
Suid-Afrika het hope potensiaal om koffiebone te kweek, in die tradisionele asook informele boerderygemeenskappe. Suid-Afrika is geseën met duisende hektaar grond wat vir koffieplantasies geskik is.
Met watter kultivars boer julle?
Ons kweek en verwerk ons eie koffie, ons voer koffie van ander lande in en ons werk met ’n toenemende aantal plaaslike boere. Ons verbou ’n seleksie kultivars uit die Arabica-spesies en doen ook veldproewe met robusta ( Coffea canephora) en inheemse wildekoffie (Coffea racemosa). Ons eie koffie en koffie wat plaaslike boere vir ons kweek, word as koffie van enkel-oorsprong verkoop. Die plaasnaam, kultivar en verwerkingsmetodes word daarop aangedui. Ons rooster self die ingevoerde koffiebone en versny dit tot ons bekende reeks van vier koffieversnitte.
Vertel meer van die proses. Wanneer oes julle en hoe word die koffiebone verwerk?
Die proses het die afgelope honderd jaar nie veel verander nie. Ons oestyd breek in Maart aan en duur tot die einde van die winter. Ons verwyder ’n aantal lae van die vrug deur gisting, wasen droogprosesse en maal dit sodat dit geskik is om gerooster te word, waarna die koffie gebrou kan word. Ons werk tans aan ’n voorlopige patent vir ’n nuwe verwerkingsmetode, en glo dit kan ’n betekenisvolle verandering in die bedryf teweeg bring.
Wat is jou gunstelingkoffie?
Beslis ’n espresso, maar soms geniet ek dit ook saam met ’n bietjie melk in ’n cappuccino.