ELMARIE THERON KNOFFELBOER
VINNIGE VRAE
Hoe het jou knoffelboerdery ontstaan?
My buurvrou het ’n klein stukkie knoffel geplant en ek was dadelik nuuskierig daaroor. Sowat vyf jaar gelede het ek met my eie boerdery begin. As jy ’n knoffelbol uitmekaar haal, kry jy sowat agt huisies. Hierdie huisies word afsonderlik geplant en maak dan weer sy eie bol vol nuwe huisies. Ek plant die Spaanse kultivar wat gewild by verbruikers is vanweë die lekker groot huisies en prominente geur en smaak.
Dit is ook maklik om skoon te maak en heerlik in kos. Ek verkoop hoofsaaklik aan Shoprite Checkers en saad aan Graceland Seed.
Aard knoffel goed by julle in die Upingtonomgewing?
Ja, ons omgewing het lekker lang, warm dae. In die winter is daar weer net genoeg koueeenhede voor dit warmer raak om goeie fotosintese en ’n lang groeitydperk te verseker.
Wanneer breek jou plant- en oestyd aan? Ons plant rondom Maart en April en oes sowat sewe maande later in Oktober en November. Knoffel is baie arbeidsintensief, want jy moet die saad breek, dan plant, die produk oes, droog en skoonmaak en verpak.
Watter invloed het die Covid-19-pandemie op die knoffelbedryf gehad?
Knoffel dien as natuurlike antibiotika. Dit is
so belangrik soos sout in jou kos en die vraag daarna is eintlik altyd hoog. Tydens die pandemie was daar ’n groter tekort as gewoonlik. Suid-Afrika voer tans meer as die helfte van die knoffel in wat hier verbruik word omdat ons nie genoeg kan produseer nie (onder meer weens hoë arbeidskoste). Die vraag sal seker altyd hoog bly, maar hopelik kan ons meer beskerming teen invoer kry. Dit sal ook help om werk te skep.
Wat is jou gunstelinggereg met knoffel?
Ek was so gelukkig om met my eie persoonlike kok te trou! My man, Riaan, maak ’n skaapboud wat hy met stukke heel knoffel en roosmaryn stop. Hy maak ook ’n groentegereg van pampoen, botterskorsie, murgpampoentjies en knoffelhuisies wat hy in die helfte deursny. Alles word dan in room gebak.