PIETER VORSTER JALAPEÑOBOER VINNIGE VRAE
Waarom is Jalapeño’s ’n aanloklike boerderygewas?
Ons verbou ’n wye verskeidenheid brandrissies (soos Habanero’s, Serrano’s en Thai-rissies), en Jalapeño’s het oor tyd baie gewild geraak. Ons gebruik dit ook in die gemengde rissiepakkies.
Met genoeg kunsmis en ’n goeie spuitprogram is Jalapeño’s ’n relatief maklike gewas om in ons omgewing te produseer. Ons kan rissies op oop lande verbou danksy Komatipoort se ideale klimaat, gunstige temperature en genoegsame water wat ons in staat stel om suksesvol tydens die wintermaande te produseer. Ons rig elke jaar ook ekstra nethuise op waarin ons gevoeliger produkte kweek wat in die hitte swaarkry. Dit help ons om deurlopend ons opbrengs en gehalte te verbeter.
Hoe lyk ’n tipiese produksiejaar by julle?
Ons verbou ons eie plantjies in kweekhuise. Dit word volgens Freshmark se aanplantingsprogram gedoen, sodat ons deurgaans produkte kan lewer. Die eerste aanplantings word rondom Januarie en Februarie gesaai en sowat vyf weke later uitgeplant. Ons oes dan einde April, begin Mei. Ons stel gedurig nuwe kultivars op die proef sodat gehalte en opbrengs kan verbeter. Ons is trots daarop om al 38 jaar lank aan Shoprite Checkers vars produkte te lewer.
Hoekom dink jy het die mark vir Jalapeño’s só fluks gegroei?
Jalapeño’s raak by die dag gewilder. Verbruikers wil nie altyd rissies hê wat té warm is nie. Jalapeño’s kan selfs in slaaie gebruik word (om nie van die alombekende Jalapeño Poppers te vergeet nie!). Jalapeño’s se pryse was nog altyd relatief stabiel en dit maak ekonomies vir ons sin om dit te produseer.
Is daar struikelblokke? Jalapeño’s is nie moeilik om te verbou nie, maar sekere tye van die jaar kan virusse en blaarsiektes ’n kwessie wees. ’n Ander probleem wat ons gereeld ervaar, is dat voëls die vrugte beskadig. Ons beoog om in die toekoms in nethuise te plant om dit te voorkom.
Eet jy self Jalapeño’s? Ons hou daarvan om die Jalapeño se pitte te verwyder en dit te vul met roomkaas en edamkaas, spek om te draai en dit oor die kole te braai.