JOHAN WOLFAARDT SOETRISSIEBOER
VINNIGE VRAE
Hoekom spesialiseer julle in soetrissies? Soetrissies word al baie jare lank in ons omgewing gekweek, spesifiek vir winterproduksie. Ons het van die begin af eiervrug, tamaties en rissies verbou, maar die soetrissies het baie gewild geraak. Ons voorsien sedert 2009 aan Freshmark en ons groeiprogram vir soetrissies het stelselmatig groter geraak. Uiteindelik het ons op ’n punt gekom waar ons besluit het om in soetrissies te spesialiseer.
Waarom is soetrissies só gewild in Komatipoort? Komatipoort in die Laeveld lê maar sowat
150 m bo seevlak. Ons winters is gevolglik matig en rypvry. DIt beteken ons kan groente produseer in ’n tyd wanneer die meeste streke in die land nie kan nie. Dit het egter ook sy nadele, want tussen Desember en April is dit só warm by ons dat ons nie kan produseer nie.
Wat werk die beste: oop landerye of bedekte boerdery?
Ons groen soetrissies word in oop landerye geproduseer. Dis ’n meer bekostigbare produksieproses. Die rooien geelsoetrissies groei egter in skadunethuise en word hidroponies verbou. Dis duur om die nethuise op te rig, daarom kos dit ons baie meer om gekleurde soetrissies te produseer. Die voordeel is egter dat ons nie met grondgedraagde siektes hoef te sukkel nie en
ons het ook nie probleme om voëls (wat baie lief is vir gekleurde soetrissies) uit te hou nie.
Wanneer begin jul plukseisoen?
Ons plant gewoonlik in Januarie. Dit duur sowat agt tot tien weke voor ons die groen soetrissies kan begin oes, terwyl die gekleurde soetrissies nog sowat twee tot drie weke langer aan die plant hang voor dit verkleur. Ons kan elke week van dieselfde plante af oes tot in November. Ons stap drie keer per week deur die nethuise om die vrugte te oes wat die regte hoeveelheid kleur het.
Soetrissieplante is baie dankbaar. Die opbrengspotensiaal hang van die groeityd af en in die wintermaande en op oop landerye is die produksiepotensiaal nie so hoog soos in die somer of in plastiektonnels nie.
Op oop landerye oes jy sowat 60 ton per hektaar, maar in ’n plastiektonnel is dit moontlik om meer as 200 ton van ’n hektaar te oes.