LISA MATTHEWS SITROENGRASBOER VINNIGE VRAE
Vertel meer van die ontstaan van julle besigheid. In 1960 het my 73-jarige pa, Ivo, en my broer Vito J. Rugani na Elandsdrift, met geen elektrisiteit en min geriewe, getrek. In 1990 het ek en my broer Marco Rugani kruie op klein skaal begin verbou. Dit was die begin van ons familiesaak wat vandag kruie en groente onder die Toscana Herbs & Fresh Produce-handelsmerk produseer. Ek en Marco boer al die afgelope
33 jaar saam en ons voorsien van die begindae af aan Freshmark.
Watter rol speel sitroengras in jul boerdery?
Ons plant sitroengras om ons kruiereeks te vergroot. Ons het destyds ’n paar steggies by ’n goeie vriend gekry wat mal was daaroor om kerries en Thai-geregte met sitroengras te kook. Op die oomblik boer ons met sowat 3 000 sitroengrasplante.
Hoe werk die produksie van sitroengras?
Die sitroengrasseisoen strek van Desember tot Julie. Sitroengras is rypgevoelig en die plant raak dormant tydens die wintermaande. Tussen Augustus en November is dit nogal ’n probleem om sitroengras te voorsien, want die plante moet eers herstel ná die winter. Sitroengras is ’n meerjarige plant, daarom kan ons jaar ná jaar van dieselfde plante af oes.
Wat is die ideale groeitoestande?
Sitroengras het volson nodig. Dit kan egter in enige grondtipe groei en gebruik matige hoeveelhede water.
Wat is markpotensiaal vir sitroengras?
Daar is ’n bestendige vraag, maar die mark is taamlik beperk in Suid-Afrika en kan maklik versadig raak. Ons voer nie op die oomblik sitroengras uit nie. Die prys is darem redelik. Ons grootste kwessie as sitroengrasprodusent is juis om alles wat ons kweek, te bemark.
Is plae en siektes ’n probleem?
Plaagdruk is gelukkig beperk, daarom is dit nie nodig om te spuit nie. Siektes kom wel voor in baie nat weer, maar ons kan dit met kontak-swamdoders bekamp.
Gebruik jy sitroengras in die kombuis?
Ons is gek daaroor in rooibostee. Dit gee ’n vars, geurige smaak aan koue of warm tee.