ANDRÉ DU TOIT LEMMETJIEBOER
VINNIGE VRAE
Julle familie is bekend as wingerdboere. Waarom die skuif na sitrus? Die wynbedryf verkeer die afgelope jare onder erge finansiële druk, daarom het ons meer winsgewende gewasse begin oorweeg. Nou produseer ons sagte sitrus vir uitvoerdoeleindes en ’n plaaslike kettingwinkel. Die ander helfte van ons aanplantings is suurlemoene en lemmetjies. Sitrus het gepas by ons bestaande opset, want die bedrywige tyd is wanneer die wingerdvertakking stil is. Só kan ons arbeid regdeur die jaar meer produktief aanwend. Sitrus aard ook goed in ons omgewing. Aanvanklik het ons net sagte sitrus verbou, maar die suurlemoene en lemmetjies het ons “geërf” toe ons twee buurplase gekoop het. Intussen het ons nog lemmetjies op die nuwe grond aangeplant.
Hoe groot is die lemmetjiebedryf in Suid-Afrika?
As ’n mens statistieke sien oor sitrusaanplantings, word suurlemoene en lemmetjies gewoonlik saamgroepeer. Die totale lemmetjieaanplantings is nie vreeslik baie nie, want boere konsentreer gewoonlik op suurlemoene. Daar is nie baie produsente in die WesKaap nie. Lemmetjies is ’n nisproduk, maar dit sal oral aard waar sitrus verbou word.
Wat is die verskil tussen lemmetjies en suurlemoene? Lemmetjies is kleiner, ronder en groener as suurlemoene. Dit word geoes voor dit heeltemal ryp is en geel word. Albei vrugte het ’n hoë suurinhoud, maar suurlemoene is effens soeter.
Watter kultivar produseer jy?
Ons plant hoofsaaklik Tahiti Limes. Verlede jaar het ons ook Bears Limes gevestig. Slegs die helfte van ons lemmetjies is tans in volproduksie en die ander boorde is jonger as 5 jaar. Lemmetjies is vrugbaar en ons oes sowat 30 ton per hektaar in die volwasse boorde.
Waar bemark julle? Ons verskaf lemmetjies en suurlemoene aan Freshmark, die Kaapse varsproduktemark, die uitvoermark en private kopers. Ons kry egter die beste prys per kilogram vir vrugte wat plaaslik verkoop.