Soet soos suiker
Dis moeilik om ’n gunsteling-karamelresep te kies, maar hierdie twee is bo-aan my lys van suikersoet verleidings.
Toffieroomys
Ek karamelliseer die suiker tot dit donker is – byna té veel. Dit balanseer die soet en gee ’n diep, donker toffiesmaak wat jy eenvoudig nie kan namaak of ooit in winkelroomys sal proe nie.
8 eiergele
375 ml warm melk 200 ml suiker
250 ml louwarm room
Klits die eiergele goed tot lig in ’n groot mengbak. Voeg die warm melk in ’n dun straaltjie by terwyl jy aanhou klits. Klits vir ongeveer 3 minute. Hou die mengsel dan eenkant. Gooi die suiker in ’n swaarboompan en skud die pan sodat die suiker ’n egalige lagie vorm. Verhit, terwyl jy die pan kantel, maar nie roer nie. Sodra ál die suiker gesmelt is, verhoog die hitte en laat die suiker tot ’n diep karamelkleur kook. Voeg nou die louwarm room in ’n dun straaltjie by die karamel (wees versigtig, dit sal kwaai opborrel). Roer aanhoudend oor lae hitte tot die mengsel glad is. Voeg die karamelsous by die eiermengsel terwyl jy klits. Verkoel die vla tot koud en karring dit in ’n roomysmaker tot byna gevries. As jy nie ’n roomysmaker het nie, giet die koue vla in ’n geskikte bak en sit in die vrieskas tot die buitekante begin vries. Klits die mengsel goed deur (om die yskristalle op te breek en die roomys ’n gladde tekstuur te gee). Vries weer en herhaal die klits-en-vriesproses nog een keer.
Lewer 6-8 porsies.
Karamelfudge in die mikrogolf
250 g botter
500 ml strooisuiker
1 blik (385 g) kondensmelk 25 ml vanieljegeursel 20 ml witasyn
5 ml seesoutvlokkies
Smeer ’n oondpan van 20 cm x 20 cm met botter en voer dit met foelie uit. Smeer weer. Mikrogolf die botter vir 1 minuut teen 100%. Voeg die strooisuiker en kondensmelk by, maar moenie roer nie. Mikrogolf weer vir 1 minuut teen 100%. Roer goed met ’n houtlepel tot die suiker opgelos is. Mikrogolf vir 12 minute teen 100%. Onderbreek die siklus elke 3 minute en roer goed. Voeg die vanieljegeursel, asyn en seesout by en klop dan die mengsel met die houtlepel tot dit begin verdik en nie meer blink nie, maar ’n dowwe kleur kry. Giet dadelik in die voorbereide oondpan, smeer gelyk en laat afkoel. Sny in blokkies voor dit heeltemal ferm is. Lewer 30 stukkies fudge.