Koffiekapitaal

’n Koppie boeretroos is nie net goed om ons soggens wakker te kry nie. Met ’n skeut likeur, rum of whisky, en ’n lepel room bygeroer, staan dit maklik in vir nagereg.

Roomlikeursjokoladekoffie

1 liter sterk koffie

60 ml roomlikeur

60 ml room, geklop

20 ml bruinsuiker

Hand vol klein malvalekkers 20 ml warmsjokoladepoeier

Giet die koffie in vier bekers (maak elkeen ongeveer driekwart vol). Voeg 15 ml roomlikeur by elk en skep 15 ml geklopte room op. Sprinkel die bruinsuiker oor en stapel klein malvalekkers bo-op. Sprinkel die warmsjokoladepoeier oor en drup nog ’n bietjie roomlikeur oor. Lewer 4 porsies.

Ierse koffie

120 ml goeie whisky

750 ml sterk, vars koffie Ongeveer 60 ml suiker

250 ml vars room, saggeklop

Giet 30 ml whisky onder in elk van vier verhitte glase of glasbekers. Verdeel die koffie tussen die glase en geur elk met suiker.

Roer om op te los. Skep 60 ml room bo-op elkeen en sit dadelik voor. Lewer 4 porsies.

Affogato

’n Eg Italiaanse drankie vir ná ete. Jy kan dit vereenvoudig deur slegs ’n skep goeie vanieljeroomys by ’n koppie sterk, swart koffie te voeg en dit só voor te sit. (Met 60 ml rum gemaak, het dié koffie taamlik skop. Pas die hoeveelhede dus aan na smaak.)

60 ml gerasperde donkersjokolade

250 ml baie sterk, warm swart koffie (of espresso)

30-60 ml donker rum 4 skeppe goeie vanieljeof sjokoladeroomys

Skep ’n eetlepel vol gerasperde sjokolade in elk van vier koffiekoppies. Meng die koffie en rum en verdeel tussen die koppies. Roer goed om dit met die sjokolade te meng. Skep roomys in elkeen en sit dadelik voor. Lewer 4 porsies.