Karamel-en-roomverjaardagkoek
Sponskoek
4 ekstragroot eiers
460 ml suiker
10 ml vanieljegeursel
125 ml elk water en melk 100 ml olie
500 ml koekmeel
10 ml bakpoeier
2 ml sout
Vulsel en versiersel
500 ml vars room
50 ml vanieljegeur kitspoedingpoeier
1 blik (360 g) karamelkondensmelk
Voorverhit die oond tot 180 °C en smeer twee koekpanne van 20 cm elk. Voer die panne met bakpapier uit en smeer weer. Sponskoek: Klits die eiers baie
goed en voeg die suiker lepel vir lepel by, terwyl jy aanhoudend klits. Klits vir 10 minute ná die laaste suiker bygevoeg is tot die mengsel dik en liggeel is. Klits die vanieljegeursel by. Verhit die water, melk en olie saam tot kookpunt en verwyder van die hitte. Sif die koekmeel, bakpoeier en sout oor die eiermengsel en vou liggies in. Voeg die warm melkmengsel by en meng liggies tot ’n gladde beslag vorm. Verdeel tussen die twee panne en bak vir 25-30 minute tot die koeke hoog uitgerys en deurgaar is. Laat die koeke vir ’n paar minute in die panne afkoel voor jy dit op draadrakke uitkeer om verder af te koel. Wanneer jy gereed is om die koek te versier, sny elke koeklaag in twee of drie dunner lae.
Vulsel: Klits die room en kitspoedingpoeier saam styf. Smeer ’n eetlepel karamelkondensmelk op elke koeklaag, gevolg deur ’n dun laag van die roommengsel. Klits die orige kondensmelk saam met die orige roommengsel en verkoel tot dit styf is. Smeer die versiersel op en rondom die koek. Hou die koek in die yskas, maar haal dit ’n halfuur voor teetyd uit om kamertemperatuur te bereik. Lewer 1 groot koek (12 porsies).