Turkse lekkers
Turkse Lokum (of Turkish Delight) is my pa en sy susters se gunstelinglekkers. Daar was altyd ’n plat, donkerrooi boksie met pienk en wit blokkies versuikerbestuifde Beacon Turkish Delight soos ’n kosbare skat in waspapier toegevou binne-in, diep in ’n kas in ons kombuis weggesteek (waarvan hy gedink het ons nie weet nie, dus moes ons ons skelm etery versigtig rantsoeneer…). Een jaar met Vadersdag wou ek hom verras met tuisgemaakte Turkish Delight. Ek was jonk – nog in die laerskool – en my resep was ’n pakkie rooi jellie wat ek met net ’n kwart van die water aangemaak en toe in blokkies gesny het. Dit is toe in versiersuiker gerol. My arme pa het daardie Sondagoggend voor kerk ’n hele bord vol harde, taai jellieblokkies met ’n koppie tee afgewurg. Ek het intussen darem geleer om die ware Jakob te maak. Dit kos meer tyd en geduld as om jellie te maak, maar die eindresultaat is oor en oor die moeite werd!
4 x 250 ml witsuiker 4 koppies water
Sap van 1 groot suurlemoen 310 ml mielieblom (maizena) 5 ml kremetart
60 ml roosstroop
10 ml rooswater
Pienk of rooi voedselkleursel 80 ml fyngekapte pimperneute (opsioneel) 500 ml versiersuiker, gesif
Bespuit ’ n vierkantige koekpan van 20 x 20 cm met kleefwerende kossproei. Voer netjies met foelie uit en bespuit die foelie met kleefwerende kossproei.
Sit twee groot kastrolle op die stoof. Gooi al die suiker en 375 ml (1½ koppies) van die water in die een kastrol. Gooi die orige 680 ml (2 ¾ koppies) water, suurlemoensap, mielieblom, kremetart en roosstroop in die ander kastrol en klits dit met ’n draadklitser tot al die mielieblom opgelos en daar geen klonte in is nie. Verhit nou albei kastrolle. Verhit die suiker en water tot al die suiker opgelos is voor dit kookpunt bereik en kook dit tot 240 °F op ’n suikertermometer (of tot sagtebalstadium, as jy die kouewatertoets wil doen).
Terwyl die suikerstroop kook, verhit die mielieblommengsel stadig, terwyl aanhoudend met ’n draadklitser geklits word, tot die mengsel baie dik word en soos dik wit petroleumjellie lyk. Verwyder die kastrol van die hitte. Giet nou die kokende suikerstroop (sodra dit die regte temperatuur bereik het) by die mielieblommengsel in ’n dun straaltjie, terwyl steeds aanhou