Blindevinke
Hierdie heerlike, gevulde pakkies vleis is een van my gesin se gunstelinge. Ek gebruik verskillende vulsels, maar die lekkerste is seker hierdie een met gesmelte kaas.
50 ml olyfolie
1 mediumgroot ui, fyngekap
200 g spek, gesnipper
250 g sampioene, gesnipper
250 ml dik witsous, afgekoel
250 ml gerasperde cheddarkaas
250 ml spinasiepuree
60 ml droë broodkrummels 12 beesbinneboudskywe, sowat 7 cm x 15 cm groot en 1 cm dik
Gegeurde sout van jou keuse
250 ml warm aftreksel van jou keuse
Braai die ui tot glansend en bruin in 15 ml van die olie. Voeg die spek by en braai tot gaar, maar nie bros nie. Voeg die sampioene by en roerbraai totdat die vog verdamp het. Skep die mengsel uit en laat afkoel. Meng die afgekoelde uiemengsel met die witsous, kaas, spinasiepuree en broodkrummels, en geur na smaak met sout en peper.
Plaas die vleis op ’n werkoppervlak en bedek dit met kleefplastiek. Slaan enige oneweredige dele plat met ’n vleishamer en druk dan die skywe so plat moontlik met ’n snyplank. Skep 3-4 eetlepels van die vulsel op elke skyf. Vou die pakkies toe deur twee teenoorgestelde sye oor die vulsel te vou; herhaal met die ander twee sye. Bind vas met katoentou (of gebruik prei of sprietui). Verhit dieselfde kastrol waarin die vulsels gaargemaak is. Strooi gegeurde sout oor en vryf bietjie van die oorblywende olyfolie oor die vleis. Braai die pakkies tot bruin aan albei kante, maar nie gaar nie. Sit dan al die bruingebraaide pakkies in die kastrol, giet die kookwater oor en kook tot die vleis sag is. Sny die tou los en verwyder dit voordat jy die blindevinke voorsit. Lewer 6 porsies.